Ərzaq aldı içindən qurd çıxdı- “Arazsupermarket”lər şəbəkəsindən şikayətlər bitmir+FOTO

Vətəndaşın “Arazsupermarket”dən aldığı ərzaq məhsulunun içindən qurd çıxıb. Məhsulun istehsalçısı isə “Bolluq” şirkətidir.

İndi vətəndaş bilmir ki, başına gələn xoşagəlməz hadisə üçün kimə müraciət etsin:

“İçində qurd, sürfə, bit... bir sözlə, nə istəsən tapa bilərsən. Qida Təhlükəsizliyi Agentliyi belə şeyləri görmür, yalnız sahibkarların onları "görməsini" istəyir. "Araz" qədər murdar market tanımıram, hər zir-zibili müştərilərə sırıyırlar. Elliklə boykot etmək gərəkdir belələrini... Hələ arsız-arsız "Araz baba" deyib dələduz "babalarını" reklam edirlər. "Bolluq" da cəzalandırılmalıdır, belə dələduzluğa görə...”

Təəssüflə qeyd edək ki digər iri ticarət şəbəkələri kimi “Arazsupermarket”lər şəbəkəsi də istehlakçı hüququnu addımbaşı pozur. Belə pozuntular arasında vaxtı keçmiş məhsullar da, vitrindəki qiymətlə kassadakı qiymətlər arasındakı uyğunsuzluq da var.

Bu günlərdə bir oxucu saytımıza bildirdi ki, Sumqayıt şəhəri 6-cı mikrorayondakı “Arazsupermarket”ə girdim:

“Bir neçə mal götürdüm. Baxdım ki, qarabaşağa 3 dəfə endirim var. 3 manat 99 qəpik olan qarabaşaq qutusu 1 manat 30 qəpiyə düşüb. Bir qutu götürdüm. Kassada vurulan çekə baxanda gördüm ki, məndən 3 manat 99 qəpik çıxıblar. Etirazımı bildirdim. Əvvəlcə məni eşitmək istəmədilər. Məcburi şəkildə marketin nümayəndəsini vitrinin yanına apardım. Əlimdəki malla vitrindəki malın eyni olduğunu görəndə nümayəndə bildirdi ki, “işçilər səhv eləyib. Malın qiymətini düz yazmayıblar”. Lakin mənim uzun dirənişimdən sonra etriaf etdilər ki, “qiymətdə endirim olsa da bu sistemə oturdulmayıb. Ona görə də belə olub”.Yəni mən çekə baxmasaydım, təkcə bir malda 2 manat itirəcəkdim”.

Göründüyü kimi “Arazsupermarket” şəbəkəsində hərə bir cür incidilir. Kimsə haqqını tələb edəndə əvvəlcə onu susdurmağa çalışırlar. İş ciddiləşəndə isə deyirlər ki, “şikayət etsəniz satıcını işdən çıxardacaqlar. O da yazıqdır, balası var”.

Yəni pul üçün “Arazsupermarket”lər şəbəkəsi lazım gələndə insanların heysiyyatı ilə də oynayırlar. Bu isə nə əxlaqa, nə də ki, qanuna sığmır.

News365.az