Entoni Teylor türk hakimlərinə rəhbərlik edəcək

İngiltərənin tanınmış futbol hakimi Entoni Teylor Türkiyə Futbol Federasiyasında (TFF) yeni vəzifəyə başlayıb.

News365.az xəbər verir ki, bu barədə TFF-nin Mərkəzi Hakimlər Komitəsi (MHK) məlumat yayıb.

Bildirilib ki, uzun illər İngiltərə Futbol Assosiasiyasının tərkibində elit hakim kimi fəaliyyət göstərən Entoni Teylor Mərkəzi Hakimlər Komitəsinin (MHK) Elit Hakimlər Direktoru vəzifəsinə təyin edilib.

Yeni vəzifəsində Entoni Teylor elit kateqoriyalı hakimlərin texniki inkişaf proqramlarının hazırlanmasına, onların fəaliyyətinin qiymətləndirilməsi sisteminin təkmilləşdirilməsinə, tədris proqramlarının təşkilinə, oyunların təhlili və geribildirim mexanizmlərinin gücləndirilməsinə, həmçinin UEFA və FIFA standartlarına uyğun hakim inkişaf strategiyasının formalaşdırılmasına rəhbərlik edəcək.

2013-cü ildən FIFA referisi olan 46 yaşlı mütəxəssis karyerası ərzində FIFA Dünya Kuboku, UEFA Avropa çempionatı, UEFA Çempionlar Liqası, UEFA Avropa Liqası, UEFA Millətlər Liqası və FIFA Klublararası Dünya Çempionatı kimi nüfuzlu turnirlərdə çoxsaylı vacib qarşılaşmaları idarə edib.

Teylor beynəlxalq arenada 2022/2023 mövsümü UEFA Avropa Liqasının finalını, 2023 FIFA Klublararası Dünya Çempionatının finalını, 2021 UEFA Millətlər Liqasının finalını və 2020 UEFA Superkubokunun həlledici görüşünü idarə edib. O, həmçinin İngiltərədə FA Kuboku, Liqa Kuboku və digər nüfuzlu yarışların finallarında baş hakim olub.