Dünyanın ən etibarlı avtomobil markaları açıqlanıb – siyahıda yaponlar üstünlük təşkil edir

Avtomobil alarkən sürücülərin diqqət etdiyi əsas məsələlərdən biri etibarlılıqdır. Bəs hansı markaların avtomobilləri daha az problem yaradır və uzun müddət istismar oluna bilir?

Consumer Reports-un 2026-cı il üzrə avtomobil etibarlılığı araşdırmasında təxminən 380 min avtomobillə bağlı məlumatlar təhlil edilib. Araşdırmada mühərrik, transmissiya, elektronika, elektrik sistemi və digər mümkün nasazlıqlar nəzərə alınıb.

Nəticələrə əsasən, Toyota 66 balla yeni avtomobillər üzrə proqnozlaşdırılan etibarlılıq göstəricisində birinci olub. İkinci pillədə Subaru – 63 bal, üçüncü yerdə isə Lexus – 60 bal qərarlaşıb.

İlk beşlikdə daha iki marka yer alıb:

- Toyota – 66 bal

- Subaru – 63 bal

- Lexus – 60 bal

- Honda – 59 bal

- BMW – 58 bal

Araşdırmaya görə, Asiya avtomobil markaları etibarlılıq göstəricilərində üstünlük təşkil edir. İlk 10-luqda Toyota, Subaru, Lexus, Honda, Nissan, Acura və Kia kimi Asiya markaları yer alıb.

Maraqlıdır ki, hibrid avtomobillər də etibarlılıq baxımından yaxşı nəticə göstərib. Bunun əksinə olaraq, tam elektrik və plug-in hibrid avtomobillərdə müəyyən texniki problemlərin daha çox müşahidə olunduğu bildirilib. Consumer Reports-un məlumatına görə, elektrik və plug-in hibrid modellər orta hesabla daxiliyanma mühərrikli avtomobillərdən daha çox problem yaşadıb.

İkinci əl avtomobil bazarında isə nəticə bir qədər fərqlidir. Consumer Reports-un 5–10 yaşlı avtomobillərlə bağlı araşdırmasında Lexus birinci, Toyota ikinci, Mazda üçüncü, Honda isə dördüncü sırada göstərilib.

Ekspertlərin fikrincə, avtomobilin etibarlılığı yalnız marka ilə müəyyənləşmir. Konkret model, buraxılış ili, mühərrik və transmissiya, texniki xidmətin vaxtında aparılması və avtomobilin əvvəlki istifadə vəziyyəti də böyük rol oynayır.

Bu səbəbdən avtomobil seçərkən yalnız markaya deyil, konkret model və buraxılış ilinə dair etibarlılıq göstəricilərinə də baxmaq tövsiyə olunur.