Cənab nazir, bəyəm bu insan dövlətdən çoxmu şey istəyir?

Azərbaycan Akademik Milli Teatrının sabiq əməkdaşı, Əməkdar artist Mehriban Xanlarova  Prezidenti İlham Əliyevə müraciət ünvanlayıb.

Aktrisa müraciətində bildirib ki, 7 ay öncə çox böyük haqsızlıqla üzləşib:

“Yeddi ay öncə, məmur özbaşınalıqlarını Sizə çatdırmaq üçün yazılar yazmışam. Mənə Milli Dram Teatrından bildirildi ki, “sən heç bir şey yaza bilməzsən”, “deyə bilməzsən” və işdən azad edilməyim üçün hazır ərizəni qarşıma qoydular, “imzalayın” dedilər. Mən də, sadəcə, imzaladım”.

Ötən müddət maddi və mənəvi böhran yaşayan Əməkdar artist son ümidi Dövlətimizin başçısına müraciət etmək görüb. Səbəbsə çox sadədir:

“Yeddi aydır, döymədiyim qapı yoxdur. Xeyli sayda məktublar göndərmişəm, təəssüflər olsun ki, heç birindən cavab gəlməyib. Mənə deyirlər ki, “get, sən nə istəyirsənsə, onu da et”.

Məmur laqeyidliyi üzləşən Mehriban Xanlarovanın bütün təşəbbüsləri bu günə qədər cavabsız və nəticəsiz qalıb. Nəhayət, onu Prezident İlham Əliyevə ünvanladığı məktub Mədəniyyət Nazirliyinə göndərilib.

“Nazirlikdən bildirildi ki. Sizə yazdığım məktub çatdırılıb və nazirliyə göndərilib.  Buna görə Sizə dərin minnətdarlığımı bildirirəm. O məktubda Sizə məni Milli Dram Teatrına qaytarmağınız üçün yalvarmışdım… Adını çəkmədiyim məmurlar məni teatrdakı işimə bərpa etmədilər. Adını da belə qoyurlar: Guya dövlətə qarşı çıxmışam. Mən hər zaman Ulu Öndər Heydər Əliyevin ideyalarına, Sizin həyata keçirdiyiniz dövlət siyasətinə sadiq olmuşam, ölənədək də sadiq qalacağam. Çünki mən dövləti, dövlətçiliyi, Azərbaycanı, torpağımızı, xalqımızı, Prezidentimi sevən vətəndaşam. İnanın, məni elə vəziyyətə salıblar ki, Sizə videomüraciət edirəm, o qədər həyəcanlıyam ki, sözlərimi ardıcıllıqla deyə bilmirəm. Sizə yalvarmaqdan heç vaxt utanmamışam, utanmaram da… Yenidən Sizə müraciət edirəm, məni teatra geri qaytarın. Daha məmurların adlarını çəkmək istəmirəm. Möhtərəm Prezident, mənim Sizdən və Allahdan başqa heç kəsim yoxdur. Bir daha xahiş edirəm, məni doğma teatrıma qaytarın”-deyə məktubda qeyd olunur.

Təəccüblüdür, deyilmi?!

Həyatını teatra bağlamış və əvəzində həyatda çox az qazanmış bir qadının, bir aktrisanın müracətinə laqeyid qalmaq sadəcə mümkün deyil.

Bəyəm bu insan bu dövlətdən çoxmu şey istəyir?

O, sadəcə ömrünü şam kimi əritdiyi teatrın divarları arasında nəfəs almaq istəyir. İstəyir ki, qalan ömrü sənət dostlarının arasında keçsin. Sevdiyi rolları ilə arada-sırada tamaşaçıların görüşünə gəlsin.

Bunda pis nə var ki?..

Bu cür xırda şeyləri arzu və xəyal edənlər ancaq sənət fədailəridir. Fədailərsə nə vəzifə, nə pul, nə də mənsəb istəyir. Sadəcə həyat verdiyi rolların işığında qocalıb getmək istəyir.

Sadə bir sənət adamının ülvi arzuları qarşısına sədd çəkmək ən azından insafsızlıqdır. Üstəlik bu peşəkarlığa qarşı inzibati cəza tədbiridir.

Ola bilsin ki, Mehriban Xanlarova bir qədər ərköyündür. Bəlkə də teatrda kiminsə qəlbinə toxunub. Amma belə xırda məsələlərə görə insanı ömürlük evə “həbs” eləmək olmaz. Teatrdan uzaq tutmaq nə peşəkarlığa, nə insanlığa, nə də idarəçiliyə sığmır.

Olmazmı ki, onu həyatından çox sevdiyi teatra qaytarsınlar, ara-sıra rol versinlər. Və bunu müəyyən şərtlər çərçivəsində etmək də olar.

Amma görünüən odur ki, Akademik Milli Dram Teatrında tam başqa atmosfer var. Teatrın rəhbərliyi kollektivi qanunlarla və insani dəyərlərlə yox, öz ambisiyası ilə idarə edir. Və rəhbərliyin iradəsinə qarşı çıxanlarsa ən ağır şəkildə cəzalandırılır. Bu cəza metodu isə görünən odur ki, çox zaman əmək qanunvericiliyini və insanların konistision hüquqlarını pozmaqla edilir.

Bu isə ancaq təəssüf və hiddət doğurur. Ən pisi də odur ki, bütün bunlar Mədəniyyət Nazirliyinin gözü qarşısında baş verir.

Nazirliksə hələki susur. Susmaqsa razılıq əlamətidir. Deməli Teatrda baş verən qanunsuzluqlar Nazirliyin maraqlarına xidmət edir.

Hələ onu demirik ki, Prezident Adminstrasiyasından göndərilən məktuba Mədəniyyət Nazirliyinin laqeyid qalması heç bir məntiqə sığmır. Deməli, Nazirlikdə tamam başqa atmosfer var.

Belədirsə heyf...

Bura artıq sözün bitdiyi yerdir.

News365.az