"Cinayət törədənlər qanun qarşısında cavab verəcək" – Zaur Məmmədovdan Vardanyan XƏBƏRDARLIĞI
Bəzi beynəlxalq dairələrin Ruben Vardanyanla bağlı açıqlamaları Azərbaycanda etirazla qarşılanır. Politoloq Zaur Məmmədov bildirib ki, Azərbaycan xalqına və dövlətinə qarşı cinayət törətməkdə ittiham olunan şəxslərin məsuliyyətdən yayınması mümkün deyil.
Politoloq Zaur Məmmədov bu fikirləri News365.az-a açıqlamasında səsləndirib.
Onun sözlərinə görə, Ruben Vardanyan barədə müxtəlif beynəlxalq təşkilatlar və lobbi qrupları tərəfindən səsləndirilən bəyanatlar reallığı əks etdirmir:
"Ruben Vardanyan beynəlxalq terrorçuluq və terrorçuluğun maliyyələşdirilməsi ilə bağlı ittiham olunan şəxsdir. O, qanunsuz şəkildə Azərbaycanın Qarabağ bölgəsinə gəlib və burada separatçı rejimin fəaliyyətində fəal iştirak edib. Vardanyanın əsas məqsədi Azərbaycan-Ermənistan sülh prosesinə mane olmaq, bölgədə gərginliyi artırmaq və separatçı qüvvələrin fəaliyyətini davam etdirmək idi."
Politoloq qeyd edib ki, Vardanyan Qarabağdakı qanunsuz silahlı birləşmələrin fəaliyyətinə dəstək verib və Azərbaycan Ordusuna qarşı törədilən təxribatlarda rol oynayıb:
"Məhz onun apardığı siyasət nəticəsində terrorçu şəbəkələri genişləndirildi, qanunsuz silahlı birləşmələr Azərbaycan Ordusuna qarşı hücumlar həyata keçirdi. Bu hadisələr zamanı insan tələfatı baş verdi və mülki əhalinin zərər çəkməsində də onun məsuliyyəti var."
Zaur Məmmədov bildirib ki, Vardanyanın fəaliyyəti təkcə Azərbaycanla məhdudlaşmayıb:
"Onun adı müxtəlif ölkələrdə qanunsuz maliyyə əməliyyatları, terrorçuluğun maliyyələşdirilməsi və digər cinayət xarakterli fəaliyyətlərdə hallanıb. Ukrayna ilə bağlı proseslərdə də adı çəkilib və bu məsələlər müxtəlif mənbələrdə də öz əksini tapıb."
Politoloq əlavə edib ki, bəzi xarici dairələrin Vardanyanın müdafiəsinə yönəlmiş bəyanatları Azərbaycanın mövqeyini dəyişməyəcək:
"Kimliyindən və hansı bəyanatları verməsindən asılı olmayaraq, Azərbaycan dövlətinə və xalqına qarşı cinayət törətmiş şəxslər qanun qarşısında cavab verməlidirlər. Heç bir beynəlxalq təzyiq bu prinsipi dəyişə bilməz."
