Bu qədər sərvət olar? Dünyanın ən varlı 10 insanı

Dünyanın ən varlı insanlarının sərvəti 2026-cı ilin sentyabrında yeni rekordlara yaxınlaşıb. Forbes-in sentyabrın 1-nə olan hesablamasına görə, dünyanın ən zəngin 10 şəxsi ümumilikdə təxminən 2,8 trilyon dollar sərvətə sahibdir. Bu göstərici əvvəlki ayla müqayisədə təxminən 200 milyard dollar artıb. 

Siyahıya yenə “Tesla” və “SpaceX” şirkətlərinin rəhbəri İlon Mask başçılıq edir. Onun sərvəti bir ay ərzində 202 milyard dollar artaraq 892 milyard dollara çatıb. Maskın sərvətinin əsas hissəsi “SpaceX” və “Tesla”dakı paylarından formalaşır. O, iyunda tarixdə ilk dəfə sərvəti 1 trilyon dolları keçən şəxs olub. 

İkinci pillədə “Google”un həmtəsisçisi Larri Peyc qərarlaşıb. Onun sərvəti 277 milyard dollar qiymətləndirilir. Üçüncü yerdə isə “Amazon”un təsisçisi Ceff Bezos var. Bezosun sərvəti 268 milyard dollar təşkil edir. 

Dünyanın ən zəngin 10 şəxsi belə sıralanır:

1. İlon Mask — 892 milyard dollar

2. Larri Peyc — 277 milyard dollar

3. Ceff Bezos — 268 milyard dollar

4. Sergey Brin — 256 milyard dollar

5. Maykl Dell — 241 milyard dollar

6. Mark Zukerberq — 197 milyard dollar

7. Larri Ellison — 193 milyard dollar

8. Censen Huanq — 191 milyard dollar

9. Stiv Balmer — 155 milyard dollar

10. Amansio Orteqa — 148 milyard dollar 

Siyahıda diqqət çəkən məqamlardan biri Larri Ellisonun mövqeyini yüksəltməsidir. “Oracle”ın həmtəsisçisi əvvəlki ay 8-ci yerdə olduğu halda, sərvətini 25 milyard dollar artıraraq 7-ci pilləyə qalxıb. Nvidia rəhbəri Censen Huanq isə 17 milyard dollar varlanmasına baxmayaraq, Ellisonla yerlərini dəyişərək 8-ci sıraya düşüb. 

Digər tərəfdən, uzun illər dünyanın ən varlıları arasında olan Bernar Arno və Uorren Baffet bu dəfə ilk onluqda yer almayıb. Onların yerini “Microsoft”un keçmiş rəhbəri Stiv Balmer və “Zara”nın sahibi “Inditex”in qurucularından olan ispaniyalı milyarder Amansio Orteqa tutub. 

Maraqlıdır ki, ilk onluqdakı 10 milyarderdən 9-u ABŞ vətəndaşıdır. Siyahıdakı yeganə amerikalı olmayan milyarder İspaniya vətəndaşı Amansio Orteqadır. Həmçinin ilk onluğun bütün üzvləri kişilərdir və onların beşinin sərvəti 200 milyard dollardan çoxdur. 

Forbes qeyd edir ki, milyarderlərin sərvəti səhmlərin qiymətindən asılı olaraq demək olar ki, hər gün dəyişir. Buna görə də siyahıdakı rəqəmlər sabit deyil və gün ərzində belə əhəmiyyətli dərəcədə arta və ya azala bilər.