“Bu gün mənim üçün də yeni bir başlanğıcdır” - Vəfa Vəliyeva
Bu gün ölkədə minlərlə uşaq üçün yeni həyat mərhələsinin ilk addımı atılıb. O uşaqlar arasında mənim də oğlum var.
Bir ana üçün övladının ilk dəfə məktəbli formasında qarşısında dayanmasını sözlə ifadə etmək çətindir. Bir tərəfdən qürur duyursan, digər tərəfdən isə illərin necə tez keçdiyini anlayıb kövrəlirsən.
Sanki dünən idi… Onu ilk dəfə qucağıma aldığım gün. İlk gülüşü, ilk sözü, ilk addımları… Bu gün isə çiynində məktəb çantası, üzündə həyəcanla yeni bir yola başlayır.
Sinan, bu yol sənə yeni dostlar, yeni biliklər, gözəl xatirələr qazandırsın. Qarşına çıxan hər çətinlik səni daha güclü etsin. Hər zaman yaxşı insan olmağı, öyrənməkdən qorxmamağı və arzularının arxasınca getməyi unutma.
Bir ana olaraq ən böyük arzum odur ki, sən sağlam, xoşbəxt və vicdanlı bir insan kimi böyüyəsən. Həyatda hansı peşəni seçməyindən asılı olmayaraq, hər zaman yaxşılığınla, mərhəmətinlə və insanlığınla seçiləsən.
Amma bu gün təkcə mənim üçün deyil, atan üçün də qürur və həyəcanla dolu xüsusi bir gündür. Çünki övladının ilk dəfə məktəb çantasını çiyninə alıb yeni həyata addımladığını görmək hər bir valideyn üçün unudulmaz hissdir.
Bizim sənə bir diləyimiz var:
Həyat yolun həmişə işıqlı olsun, Sinan. Qarşına nə qədər çətinlik çıxsa da, özünə və doğru bildiyin yola inamını itirmə. Biz həmişə sənin yanında olacağıq – ilk addımında da, uğurlarında da, çətin günlərində də.
Sən böyüdükcə biz də səninlə birlikdə böyüyəcəyik. Sənin hər uğurun bizim sevincimiz, hər arzun bizim duamız olacaq.
Bu gün məktəbə ilk addımını atdın. Qarşında uzun, gözəl bir yol var. Allah səni qorusun, yolunu açıq, bəxtini gözəl etsin.
Yolun açıq, uğurun bol olsun, bizim balamız.
İlk məktəb günün mübarək!
Jurnalist Vəfa Vəliyeva, News365.az
