“Azərbaycan Məhəlləsi” və bölgədəki vəziyyət- İki lideri bir araya gətirən səbəblər

Xəbər verdiyimiz kimi bu gün Azərbaycan Prezidenti İlham Əliyev Türkiyəyə səfər edəcək. Səfər çərçivəsində iki ölkə lideri zəlzələdən sonra Kahramanmaraşda salınan “Azərbaycan Məhəlləsi”nin açılışında iştirak edəcəklər.

Artıq Türkiyə Prezidenti Rəcəb Tayyib Ərdoğan bu gün Kahramanmaraşda açılışı olacaq “Azərbaycan Məhəlləsi” ilə bağlı “X” hesabında paylaşım edib.

Paylaşımda deyilir:

“Bu gün zəlzələ bölgəsində can Azərbaycanın dəstəyi ilə vətəndaşlarımıza “Azərbaycan Məhəlləsində” 49 056 iş yeri və yaşayış yeri təhvil veririk. Beləliklə, təhvil verdiyimiz yaşayış yerlərinin ümumi sayını 250 minə çatdırırıq”.

Təbii ki, Azərbaycanın atdığı addım təqdirəlayiq hadisədir. Amma başqa cür də ola bilməz. Çünki iki qardaş ölkə hər zaman bir olub, bütün problemləri birgə çözüb, sevincləri birgə paylaşıb. Və bu mənada Türkiyədə zəlzələ baş verərkən ilk dəstək Azərbaycandan gəldi.

Xilasetmə işlərində və zəlzələnin fəsadlarının aradan qaldırılmasında Azərbaycan böyük əmək sərf elədi. Bunun ardınca Azərbaycan dövləti bəyan etdi ki, Kahramanmaraşda ən müasir infrastruktura malik “Azərbaycan Məhəlləsi” inşa edəcək.

Gün o gündür. Verilən vəd uğurla başa çatıb. Və bütün Türk dünyası bu təntənəyə şahidlik etməyə hazırlaşır.

Mövzu ilə bağlı News365.az-a danışan Millət vəkili Rasim Musabəyov deyir ki, Türkiyədə zəlzələ baş verərkən ilk və ən böyük tərkiblə yardıma gələn Azərbaycan oldu:

“Sonrakı bərpa işlərində də Türkiyəyə köməklik edən dövlətlər arasında öndə gedən Azərbaycan oldu. Və Kahramanmaraşda “Azərbaycan Məhəlləsi” inşa edildi.Bu mənada bu məhəllənin açılışında Azərbaycan Prezidentinin iştirakı bir zərurətdir.Söhbət ondan getmir ki, Azərbaycanla Türkiyə çətin və xoş gündə çiyin-çiyinə durur. Hansı ki, “bir millət, iki dövlət” ayrı cür də ola bilməz”.

Müsahibimiz onu da qeyd edib ki, bu görüşdə Azərbaycan və Türkiyə liderləri son zamanlar dünyada və bölgədə baş verən hadisələri də ciddi şəkildə müzakirə edəcəklər:

“Məlumdur ki, bölgəmizdə olduqca təhlükəli bir vəziyyət yaranıb. Əminəm ki, liderlər bu məsələlərə xüsusi diqqət yetirəcəklər.Hesab edirəm ki, Azərbaycan və Türkiyə indiki vəziyyətdə stabillə.dirici faktor kimi çıxış edərək bölgədəki vəziyyətə öz təsirlərini göstərəcəklər”.

Nəzərə alaq ki, İsral-İran münaqişəsi pik həddə çatıb. Və bu münaqişə böyük müharibəyə çevrilə bilər. Bundan isə bütün bölgə ölkələri kimi Azərbaycan və Türkiyə ciddi zərər görə bilər.

Ona görə də Azərbaycan və Türkiyə lideri çalışır ki, münaqişə tezliklə sonlansın və bölgəyə davamlı sülh gəlsin.

Məlumdur ki, həm Türkiyənin, həm də Azərbaycanın bölgədə kifayət qədər nüfuzu var. Və bu faktor imkan verir ki, İsral-İran münaqişəsində iki qardaş ölkə öz sözünü desin.

News365.az