"Vaşinqton özündən asılı olan bir qlobal iqtisadi sistem yaratmaq niyyətindədir"- Aqşin Kərimov

"Donald Trampın tarif siyasətini birinci prezidentlik dövründəkindən də daha da sərtləşdirməsi onu göstərir ki, Vaşinqton dünyada özündən asılı olan bir qlobal iqtisadi sistem yaratmaq niyyətindədir. "

Politoloq Aqşin Kərimov bu sözləri News365.az-a açıqlamasında deyib. 

"Bu, 1944-cü ildən bəri formalaşmış transatlantik normalar və prinsiplərə, iqtisadi qaydalara qarşı Trampın elan etdiyi yeni nəsil bir iqtisadi müharibə kimi qiymətləndirilə bilər. Donald Tramp əslində ABŞ-ın dünyadakı ən böyük rəqiblərindən biri olan Çin’i neytrallaşdırmaq və neytrallaşdırdıqdan sonra danışıqlar masasında Çin ilə müəyyən mənada güzəştlər üzərində razılıq əldə etmək məqsədi güdür.

Lakin Baydenin prezidentliyi dövründə ABŞ-ın həm İngiltərədə, həm də Çində mövqeləri bir qədər zəifləyib və Ukraynadakı müharibədən ciddi şəkildə təsirlənən Ağ Ev, Çinin geosiyasi ambisiyaları ilə üz-üzə qalıb. Çinin Rusiya-Ukrayna müharibəsində vasitəçilik missiyası ilə bağlı göstərdiyi təşəbbüslər, Səudiyyə Ərəbistanı ilə İran arasında barışıq planı və bununla yanaşı bir neçə digər mübahisəli məsələlərdə özünü etibarlı vasitəçi kimi təqdim etməsi, Birləşmiş Millətlər Təşkilatının yaxın dövrdəki mövqelərinə də əhəmiyyətli dərəcədə təsir göstərmişdir."- deyə bildirib.