Norveçdən ABŞ-yə siyasi MESAJ: Trampın kursu dəyişir?

ABŞ-dəki siyasi proseslər və seçkilərin nəticələri Avropada da diqqətlə izlənilir. Norveç hökumətinin başçısı Yonas Qar Störe Vaşinqtonda siyasi mənzərənin dəyişməsinin beynəlxalq münasibətlərə təsir göstərə biləcəyini bildirib.

Bu barədə Norveçin Baş naziri Yonas Qar Störe “Reuters” agentliyinə müsahibəsində danışıb.

Störenin sözlərinə görə, hazırda ABŞ siyasətində mövqeləri Donald Tramp və onun administrasiyasının siyasətindən daha çox Norveçin yanaşmaları ilə üst-üstə düşən qüvvələr ön plana çıxır.

Baş nazir xüsusilə iqlim dəyişikliyi, ətraf mühitin qorunması, xarici siyasət və beynəlxalq inkişafa dəstək məsələlərində bu fərqlərin özünü göstərdiyini vurğulayıb.

Störe ABŞ-də keçirilən seçkilərin nəticələrini təkcə ölkənin daxili siyasi həyatına aid hadisə kimi qiymətləndirməyib. O, bu nəticələrin dünya miqyasında baş verə biləcək dəyişikliklər baxımından da əhəmiyyət daşıdığını qeyd edərək bunu “güclü siyasi siqnal” adlandırıb.