"İdxal 3 dəfə artıb" - Natiq Cəfərlidən rəsmi rəqəmlər
İqtisadçı ekspert, Respublikaçı Alternativ (REAL) Partiyasının siyasi komitəsinin üzvü Natiq Cəfərli nazir müavininin səsləndirdiyi rəqəmləri təhlil edərək, hökumətin icra qoluna bir neçə ciddi və cavabsız qalan suallar ünvanlayıb.
News365.az həmin sualları və ölkə heyvandarlığındakı real statistik mənzərəni təqdim edir:
Nazir müavini nə vəd edib?
Xatırladaq ki, İlhamə Qədimova süd və ət məhsullarının idxaldan asılılığının azaldılacağını bəyan edərək bu hədəfləri açıqlamışdı:
2030-cu ilədək süd istehsalı 10% artırılacaq;
Mal əti istehsalı 20% yüksəldiləcək;
Qoyun əti istehsalında isə 9% artım nəzərdə tutulur.
Reallıq və rəsmi rəqəmlər: Natiq Cəfərlidən 5 mühüm sual
Ekspert Natiq Cəfərli bu hədəflərin "çox gözəl arzu və istəklər" olduğunu bildirsə də, Dövlət Statistika Komitəsinin son 5 illik (2021–2026) rəsmi hesabatlarına əsaslanaraq hökuməti real faktlarla üz-üzə qoyub:
1. Yol xəritəsi haradadır? Bu iddialı hədəflərə hansı mexanizmlərlə nail olunacaq? Müəyyən edilmiş konkret bir yol xəritəsi və ya tədbirlər ardıcıllığı mövcuddurmu?
2. İribuynuzlu heyvanların sayı niyə azalır? Rəsmi statistikaya görə, son 5 ildə (2021–2026) Azərbaycanda iribuynuzlu mal-qaranın sayı hər il mütəmadi olaraq azalıb. 2021-ci ilin əvvəlində ölkədə 2 milyon 650,7 min baş iribuynuzlu heyvan olduğu halda, 2026-cı ilin əvvəlinə bu göstərici 2 milyon 435,5 min başa düşüb. Ümumilikdə 215,2 min baş (8,1%) azalmanın səbəbləri nazirlik tərəfindən araşdırılıbmı?
3. Xırdabuynuzlu heyvanlarda 17%-lik geriləmə: Artım nəyin hesabına olacaq? Son 5 ildə qoyun və keçilərin sayı 1 milyon 399,1 min baş (təxminən 17,1%) azalıb. 2021-ci ildə ölkədə 8 milyon 156,9 min baş xırdabuynuzlu heyvan var idisə, 2026-cı il yanvarın 1-nə bu rəqəm 6 milyon 757,8 min başa geriləyib. Son 5 ildə belə kəskin azalma trendi varsa, növbəti illərdə qoyun əti istehsalının 9% artacağına kim zəmanət verir və bu trendi nə dəyişəcək?
4. Canlı mal-qara idxalı niyə 3 dəfə artıb? Son 5 ildə ölkəyə diri iribuynuzlu heyvan idxalı miqdar baxımından tam 3 dəfə artıb və cəmi 225 min baş heyvan gətirilib. İdxal bu dərəcədə sürətlə yüksəlirsə, asılılığı azaltmaq üçün indi hansı fərqli addımlar atılacaq?
5. Qoyun-keçi idxalındakı 160%-lik artımın qarşısı necə alınacaq? Eyni dövrdə diri qoyun və keçi idxalı 1,6 dəfədən çox (160%) artaraq 931 min başa çatıb. İdxalın qarşısını almaq üçün hökumətin hansı real planı var?
"Hökumətin işi arzulamaq yox, problemləri həll etməkdir"
İqtisadçı qeyd edib ki, hökumətin icra qolunun mövcud problemləri etiraf etməsi müsbət addımdır. Lakin rəsmilərin əsas vəzifəsi sadəcə rəqəmlər səsləndirmək yox, əvvəlki səhvləri dərindən təhlil edib, kənd təsərrüfatını bu böhrandan çıxaracaq real və yeni həll yolları təklif etmək olmalıdır.
