Çingiz Mehdiyevə 10 il həbs TƏLƏB EDİLDİ – Arif Rəhimovsa

“Formula 1”ə ayrılan dövlət vəsaitini mənimsəməkdə və cinayət yolu ilə qazanılmış pulları leqallaşdırmaqda ittiham olunan Bakı Şəhər Halqası əməliyyat şirkətinin keçmiş şöbə rəisi Çingiz Mehdiyevin məhkəmə istintaqı tamamlanıb.

Bakı Ağır Cinayətlər Məhkəməsində keçirilən bugünkü iclasda prokuror ittiham nitqi ilə çıxış edib.

Prokuror Mehdiyevə verilmiş ittihamların sübuta yetirildiyini elan edərək onun 10 il müddətinə azadlıqdan məhrum edilməsini, üzərinə həbs qoyulmuş 1 milyonluq əmlaklarının müsadirə olunmasını tələb edib.

İttiham tərəfi bəyan edib ki, sərbəst mühakimə edilən təqsirləndirilən məhkəmə zalında dərhal həbs edilməli, cəzasını ümumi rejimli cəzaçəkmə müəssisəsində çəkməlidir.

Bu gün eyni məsələ yenidən müzakirə edilib. Məhkəməyə sədrlik edən hakim Hakim Leyla Əsgərova-Məmmədova Arif Rəhimovun dindirilməsi ilə bağlı vəsatətə münasibət bildirməyib.

Xanım hakim bunun səbəbini vəkillərin istintaq bitərkən bu vəsatəti yenidən müdafiə etməmələri ilə əlaqələndirib.

Vəkillərə müdafiə çıxışlarına hazırlanmaları üçün vaxt verilib.

Qeyd edək ki, Baş Prokuror yanında Korrupsiyaya qarşı Mübarizə Baş İdarəsinin üstünü açdığı bu cinayət 2015-2020-ci illəri əhatə edir. Mənimsəmə epizodu üzrə dövlətə dəymiş ziyan 397 min 852 manat təşkil edir. Mehdiyev həmin məbləğin 100 min manatını geri ödəyib.