Avropa ölkələrinin Ermənistana dəstəyi ABŞ-la rəqabət məqsədi daşıyır
Avropa ölkələrinin Ermənistana verdiyi dəstək və bölgədəki siyasi təşəbbüslər son günlər yenidən gündəmə gəlib.
Bəzi ekspertlər bu addımları sırf Cənubi Qafqazdakı sabitliyi təmin etmək baxımından qiymətləndirərkən, politoloq Taleh Əliyev News365.az-a açıqlamasında məsələnin daha dərin geosiyasi kontekstdə başa düşülməsinin vacibliyini vurğulayıb.
Politoloq qeyd edib ki, Avropa liderləri Azərbaycanla Ermənistan arasında əldə olunmuş sülh prosesinə və Dağlıq Qarabağ bölgəsindəki vəziyyətə ABŞ-ın rolunu zəiflətmək məqsədilə müdaxilə edə bilirlər. Taleh Əliyev hesab edir ki, Cənubi Qafqazda, xüsusilə Azərbaycan və Ermənistan arasında inkişaf edən münasibətlərdə Avropa ölkələrinin əsas məqsədi bölgədə ABŞ-ın təsirini balanslaşdırmaqdır.
O vurğulayıb ki, Avropa üçün Rusiyanın bölgədə qalması o qədər təhlükə kimi görünmür, amma ABŞ-ın geosiyasi və iqtisadi maraqları Avropada bir sıra strateji məsələlərdə prioritet hesab olunur. Politoloqun qənaətincə, Avropa ölkələrinin mövqeyi daha çox ABŞ-ı məhdudlaşdırmaq və bölgədə öz təsirlərini gücləndirmək məqsədi daşıyır, nəinki Azərbaycan və Ermənistan arasında sülh prosesinə birbaşa dəstək.
