Anti-milli ünsürlərin hədəfi nədir? - TƏHLİL

Xəbər verdiyimiz kimi xaricdə yaşayan bir neçə azərbaycanlı ünsür aqressiv və təhrikedici formada Prezident İlham Əliyevin qaldığı hotelə daxil olmaq istəyib.

Onlar kifayət qədər qeyri-etik davranışları ilə diqqəti cəlb edərək və öz mənəviyyatlarına uyğun ifadələr işlədərək təhlükəsizlik kordonunu yarmağa və zorla hotelə daxil olmağa cəhd göstəriblər.
Azərbaycan Prezidentinin təhlükəsizlik xidmətinin əməkdaşları ABŞ polisi ilə birlikdə operativ şəkildə müdaxilə edərək həmin şəxsləri peşəkarlıqla zərərsizləşdiriblər və təxribat cəhdinin qarşısını alıblar. 

Sosial şəbəkələrdə yayılan videogörüntülərdə radikal qrup üzvlərinin açıq şəkildə nalayiq ifadələr işlətdiyi eşidilir.

Göründüyü kimi bu etiraz aksiyası deyil, bir təxripat planıdır. Çünki etirazın sivil formaları var. Və bu ünsürlərin də hədəfi nəyəsə etiraz etmək idisə, o zaman meqafonla öz etirazlarını sərbəst şəkildə ifadə edər, daha sonra çıxıb gedərdilər.

Amma bu destruktiv qüvvələr hər vəchlə Prezidentin qaldığı otelə soxulmaq istəyiblər. Və hətta bu məqsədlə mühafizə xidmətinin əməkdaşları ilə əlbəyaxa olmaqdan belə çəkinmədilər.

Bu azmış kimi təxribatçı ünsürlər küçə söyüşlərindən istifadədən belə çəkinməyiblər.

Bu isə siyasi aksiya yox, başqa bir şeydir. Daha dəqiq desək, bu anti-milli qüvvələrlə ermənipərəst qüvvələrin birgə hərəkət planı idi. Heç kimə sirr deyil ki, bu ünsürlər anti-Azərbaycan qüvvələrinin əlində alətə çevriliblər. Maddi və yaxud sosial vədlərin müqabilində alətə çevrilən bu ünsürlər çox təəssüf ki, Azərbaycanın imicinə zərər vermək üçün ermənipərəst qüvvələrlə eyni mövqedən çıxış edirlər.Çox təəssüf ki, milli ünsürlərimizin seçdiyi “mübarizə metodu”-söyüş ritorikası milli və ailə dəyərlərimizə çox böyük zərbə vurur.

Azərbaycan Prezidenti dövlətin və xalqın ali təmsilçisidir, atributudur. Ona həm ölkə daxilində, həm də xarici dövlətlərə hörmət qoyulması hər kəsin mənəvi borcudur. Bu mənada Vaşinqtonda- Prezidentin qaldığı hotelə soxulmaq istəyən adamların hərəkətini təxribat və milli maraqlara ağır zərbə kimi dəyərləndirilməlidir. Etirazın da sivil yolları var. Nə zamandan söyüş söymək siyasi mübarizə metodu olub?! Bu cür hərəkətlər Azərbaycanı istəməyən qüvvələrin dəyirmanına su tökməkdən başqa bir şey deyil.Bunun başqa adı yoxdur. Ona görə də bu cür təxribatları qəti şəkildə pislənilməli və cinayətkarlar ən ağır şəkildə cəzalandırılmalıdır.

News365.az