Aİ Ukraynaya əlavə maliyyə ayırmayacaq

Avropa İttifaqı (Aİ) vəd edilmiş islahatları həyata keçirənə qədər Ukraynaya əlavə maliyyə ayırmayacaq.

News365.az xəbər verir ki, bu barədə “Financial Times” məlumat yayıb.

Nəşrin məlumatına görə, Aİ əlavə maliyyələşdirmə üçün Kiyevdən əvvəlcə vəd edilmiş islahatları həyata keçirməsini tələb edir.

Ukrayna Prezidenti Volodimir Zelenski bundan əvvəl ölkəsinin əlavə müdafiə ehtiyaclarını 27 milyard dollar olaraq qiymətləndirib. Kiyev Avropa Komissiyasından iki illik, 90 milyard avroluq “Ukraynaya Dəstək Krediti” proqramından vəsait ayırmaqla bu boşluğu doldurmağa kömək etməsini istəyib. Brüssel 2027-ci il üçün ayrılmış vəsaitin vaxtından əvvəl ayrılması tələbini rədd edib. Aİ bunun əvəzinə Ukrayna hökumətinin öhdəliklərini yerinə yetirməsində israr edir. Tələblər arasında kiçik beynəlxalq poçt bağlamaları üçün güzəştlərin ləğvi və rəqəmsal platformalar üçün yeni vergi qaydalarının tətbiqi var.

Avropa komissarları Valdis Dombrovskis və Marta Kos Ukrayna Ali Radasının spikeri Ruslan Stefançuka göndərdikləri məktubda bildiriblər ki, zəruri islahatların həyata keçirilməsi şərtilə 2026-cı ildə əlavə yardım hələ də əlçatandır.