Ağ Ev Trampın xüsusi elçisini Moskvaya niyə göndərir?

ABŞ prezidentinin xüsusi elçisi Stİv Uitkof bu həftə Rusiyaya səfər edəcək.  Bu barədə Ağ Evin mətbuat katibi Karolin Levit açıqlama verib.

O qeyd edib ki, Uitkof Moskvada Rusiya rəhbərliyi ilə Ukraynada atəşkəs ideyasını müzakirə etmək niyyətindədir.

Bundan əlavə, Levit ABŞ-nin Rusiya Federasiyası ilə digər kanallarla da əlaqə saxladığını vurğulayıb.

"Trampın milli təhlükəsizlik üzrə müşaviri Maykl Vals da rusiyalı həmkarı ilə telefonda danışıb”, - mətbuat katibi bildirib.

Bundan əvvəl Amerikanın “Axios” nəşri Uitkofun Rusiya lideri Vladimir Putinlə görüşmək üçün martın 13-də Moskvaya gedəcəyini yazmışdı.

Xatırladaq ki, martın 11-i Səudiyyə Ərəbistanında baş tutan danışıqlardan sonra Kiyev Vaşinqtonun 30 günlük atəşkəs təklifini qəbul etməyə hazır olduğunu bəyan edib. Öz növbəsində ABŞ prezidenti Donald Tramp da buna cavab olaraq müəyyən jestlər edib. O, Ukrayna Silahlı Qüvvələrinə silah tədarükünə və kəşfiyyat məlumatlarının ötürülməsinə qoyduğu qadağanı ləğv edib.

Rusiya ilə Ukrayna arasındakı genişmiqyaslı müharibə 2022-ci ilin fevralın 24-də başlayıb. Moskva işğal zamanı qoşunları Kiyevə qədər apara bilsə də, sonradan müharibədə üstünlük nisbətən Ukraynanın tərəfinə keçib. Ukrayna qoşunları ötən ilin iyunundan əks-hücum əməliyyatlarına başladılar. Amma bu da uğurlu olmadı. Ukrayna ordusu ötən il gözlənilmədən Rusiyanın Kursk vilayətinə girdi. Son aylarda isə Rusiya yenidən döyüş meydanındakı vəziyyəti öz xeyrinə dəyişə bilib.

Tural