3 uşaqlı analar daha tez pensiyaya çıxa bilər? – mühüm TƏKLİF
Azərbaycanda son dövrlər doğum sayının aşağı düşməsi və əhalinin artım sürətinin zəifləməsi cəmiyyəti düşündürən ən aktual problemlərdən birinə çevrilib. Ekspertlər xəbərdarlıq edirlər ki, mənfi tendensiyanın qarşısını almaq üçün ailələrin sosial təminatı gücləndirilməli və çoxuşaqlı valideynlərə xüsusi imtiyazlar verilməlidir. Bu xüsusda irəli sürülən ən diqqətçəkən təkliflərdən biri hazırda qanunla 5 və daha çox uşağı olan analara tətbiq edilən erkən təqaüd hüququnun 3 uşaqlı analara da şamil olunmasıdır.
Məsələ ilə bağlı News365.az-a açıqlama verən Azad Vətən Partiyasının (AVP) sədri Akif Nağı bildirib ki, demoqrafik geriləmə dövlət səviyyəsində təxirəsalınmaz addımların atılmasını tələb edir.
Partiya sədri rəsmi statistikanın narahatlıq doğurduğunu diqqətə çatdırıb: “Ölkədə demoqrafik göstəriciləri müsbətə doğru dəyişmək üçün xüsusi dövlət proqramına ehtiyac var. Mövcud qanunvericiliyə görə, 5 uşaq böyüdən analar 60 yaşında pensiyaya çıxa bilər ki, mən bunu çox yüksək yaş həddi hesab edirəm. Bu rəqəm mütləq 55-ə endirilməlidir. Digər tərəfdən, bu güzəştdən yararlanmaq üçün qoyulan 5 uşaq şərti dəyişdirilməli, hüquq 3 uşaqlı analara da verilməlidir”.
A.Nağı vurğulayıb ki, bir neçə övlad böyütmək qadınlardan böyük fiziki və mənəvi güc tələb edir ki, bu da illər keçdikcə onların sağlamlığında iz qoyur.
“Cəmiyyət üçün 3 övlad tərbiyə edib boya-başa çatdıran ana dövlət qarşısında ən böyük missiyanı yerinə yetirmiş sayılır. Bu fədakarlıq mütləq qiymətləndirilməlidir. Təbii ki, bu addım büdcəyə müəyyən maliyyə yükü gətirəcək, lakin Azərbaycan dövlətinin gücü və imkanları bu xərcləri qarşılamağa tam yetərlidir”, – deyə müsahibimiz əlavə edib.
Siyasətçinin fikrincə, bu cür sosial islahatlar həm qadınların gələcək həyat şəraitini yaxşılaşdıracaq, həm də gənc ailələri daha çox uşaq sahibi olmağa stimullaşdıracaq. Çoxuşaqlı ailə modelinin dəstəklənməsi ölkənin gələcək demoqrafik təhlükəsizliyinin təmin olunmasında həlledici rol oynaya bilər.
