Süni intellekt bu peşələri əvəz edə bilər: İşçiləri nə gözləyir?
Texnologiyanın sürətli inkişafı iş dünyasında yeni mərhələnin başlanğıcını qoyur. Bir vaxtlar yalnız insan əməyinə ehtiyac duyulan bir çox işi indi süni intellekt vasitəsilə daha qısa müddətdə yerinə yetirmək mümkündür. Bu dəyişikliklər bəzi peşələrə tələbatı azalda, eyni zamanda yeni iş imkanları yarada bilər. Qarşıdakı dövrdə əmək bazarında üstünlük qazanmaq üçün isə texnologiyaya uyğunlaşmaq getdikcə daha vacib olacaq.
News365.az xəbər verir ki, süni intellekt mütəxəssisi Abdulla Abdullayev əmək bazarında baş verən dəyişiklikləri şərh edərkən süni intellektin təsirini yalnız iş yerlərinin azalması ilə əlaqələndirməyin düzgün olmadığını bildirib.
Onun sözlərinə görə, texnologiyanın inkişafı bəzi işlərin avtomatlaşdırılmasına səbəb olsa da, yeni ixtisasların yaranmasına və mövcud peşələrdə tələb olunan bacarıqların dəyişməsinə gətirib çıxaracaq.
Mütəxəssis hesab edir ki, ən böyük dəyişikliklər gündəlik təkrarlanan və müəyyən standartlar əsasında yerinə yetirilən işlərdə hiss olunacaq. Məlumatların işlənməsi, sadə hesabatların hazırlanması və müştərilərə ilkin dəstəyin göstərilməsi bu istiqamətdə ön plana çıxan fəaliyyətlərdəndir.
A.Abdullayevin fikrincə, sadalanan işlərin süni intellekt vasitəsilə görülməsi həmin peşələrin tamamilə yox olacağı anlamına gəlmir. Əsas dəyişiklik iş prosesinin təşkili və insan əməyinə olan tələblərlə bağlı olacaq.
İş tapmaq üçün hansı bacarıqlar vacib olacaq?
Mütəxəssis gələcəkdə əmək bazarında rəqabətədavamlı qalmaq üçün yeni texnologiyaları mənimsəməyin vacibliyini vurğulayıb. Onun fikrincə, rəqəmsal bacarıqlarını inkişaf etdirən, analitik düşünən və problemləri həll etməyi bacaran şəxslər dəyişən əmək bazarına daha asan uyğunlaşa biləcəklər.
A.Abdullayev hesab edir ki, süni intellektlə bağlı əsas məsələ insanın texnologiya ilə rəqabət aparması deyil, ondan düzgün istifadə edərək işinin keyfiyyətini və səmərəliliyini artırmasıdır.
Beləliklə, yaxın illərdə əmək bazarında uğur qazanmaq üçün təkcə mövcud peşəyə yiyələnmək kifayət etməyə bilər. Yeni alətləri öyrənmək və dəyişən tələblərə uyğunlaşmaq iş həyatında mühüm üstünlüyə çevrilə bilər.
