Kardioloqdan anomal isti xəbərdarlığı: “Ürəyin iş yükü artır, günvurma zamanı bunlara diqqət edin”
Yay aylarında müşahidə olunan anormal istilər sadəcə narahatlıq yaratmır, həm də insan sağlamlığı, xüsusilə yaşlılar və ürək-damar xəstəliklərindən əziyyət çəkənlər üçün ciddi təhlükə törədir.
Tanınmış kardioloq İdris Xəlilov News365.az-a açıqlamasında isti havaların orqanizmə təsirləri, günvurma zamanı ilkin yardım qaydaları və kondisionerdən düzgün istifadə barədə mühüm tövsiyələr verib.
İsti havada orqanizmdə nə baş verir?
Həkimin sözlərinə görə, yüksək temperatur zamanı bədəndə bir sıra dəyişikliklər qeydə alınır:
Tərləmə kəskin artır;
Dəri damarları genişlənir;
Orqanizm sürətlə su və mineral duzlar itirir;
Ürəyin iş yükü çoxalır.
Bu dəyişikliklərin nəticəsi olaraq arterial təzyiq oynaya bilər, ürək ritmi pozular, ürək çatışmazlığı və stenokardiya kimi xroniki xəstəliklər ağırlaşa bilər.
Günvurmanın əsas əlamətləri hansılardır?
Mütəxəssis günvurma zamanı dərhal təcili tibbi yardıma müraciət etməyi tələb edən əsas simptomları sıralayıb:
Bədən temperaturunun 40°C və daha yuxarı qalxması;
Güclü baş ağrısı və başgicəllənmə;
Ürəkbulanma və qusma;
Dərinin həddindən artıq isti olması;
Huşun qarışması və ya tamamilə itməsi.
Təcili yardım gələnə qədər nə etmeli? (İlk yardım qaydaları)
Kardioloq həkim briqadası çatana qədər zərərçəkmişə düzgün müdaxilə etməyin həyati əhəmiyyət daşıdığını bildirib:
Xəstəni dərhal kölgəyə və ya sərin yerə aparın, paltarını boşaldın.
Bədəni sərin (lakin buz kimi soyuq olmayan) su ilə soyudun.
Boyun, qoltuqaltı və qasıq nahiyəsinə soyuq kompres qoyun.
Əgər şəxsin huşu yerindədirsə, ona kiçik qurtumlarla su verin. Huşunu itirmiş insana isə qətiyyən ağızdan su vermək olmaz.
Kondisioner təhlükəsi: Əzələ və onurğa ağrılarının səbəbi
İdris Xəlilov özünün 47 illik klinik müşahidələrinə əsaslanaraq, son onilliklərdə boyun və bel əzələlərinin ağrıları, miozitlər və onurğa problemlərinin kəskin artmasında kondisionerlərin böyük rolu olduğunu vurğulayıb. Xüsusilə soyuq hava axınının uzun müddət birbaşa bədənə təsir etməsi bu fəsadlara yol açır. Həkim əlavə edib ki, oturaq həyat tərzi, fiziki aktivliyin azalması və artıq çəki də bu problemləri dərinləşdirən digər mühüm amillərdir.
Kardioloqun əhaliyə əsas tövsiyələri:
Otağı həddindən artıq soyutmayın.
Soyuq hava axını mütləq şəkildə boyun, kürək və bel nahiyəsindən kənara yönəldilməlidir.
Unutmayın ki, yayda tərləmək orqanizmin özünü sərinlətmək üçün yaratdığı təbii müdafiə mexanizmidir. Əsas məqsəd tərləmənin qarşısını almaq deyil, bədənin susuzlaşmasına yol verməməkdir.
"İsti havanı dəyişə bilmərik. Amma ondan qorunmağı öyrənə bilərik", — deyə İdris Xəlilov fikrini tamamlayıb.
