III Çarlz Trampın “əsas siyasi rəqibi”dir? - İbrahim Nəbioğlunun BAXIŞI

Xəbər verdiyimiz kimi Böyük Britaniyanın kralı III Çarlz ailəsi ilə birgə ABŞ-a səfərə gəlib. Və səfər çərçivəsində bir sıra maraqlı məqamlar yaşanıb.

Səfər barədə düşüncələrini yazan İbrahim Nəbioğlu qeyd edir ki, Kralı III Çarlzın ABŞ Konqresindəki çıxış ciddi siyasi rezonans doğurdu və dəfələrlə alqışlarla kəsildi:

“Xüsusilə onun qlobal təhlükəsizlik, Avropa ilə tərəfdaşlığın bərpası və Ukraynaya dəstək mövzusundakı fikirləri zalda güclü qarşılıq tapdı. Ukrayna xalqının qəhrəmanlığından bəhs edərkən belə, fərqli mövqeyi ilə tanınan J. D. Vance ayağa qalxaraq alqışlamağa məcbur qaldı. Bu detal çıxışın emosional və siyasi təsir gücünü açıq göstərir.

Kralın ritorikası klassik Britaniya diplomatiyasının ənənəvi xəttini xatırladır: balanslı, amma prinsipial. Onun çıxışında ABŞ-Avropa münasibətlərinin zəifləməsinin risklərinə açıq işarə vardı. Eyni zamanda, Ukrayna məsələsi sadəcə regional münaqişə kimi deyil, daha geniş geosiyasi sabitlik kontekstində təqdim olundu.

Maraqlıdır ki, Donald Trump-ın siyasi xəttinə yaxın duran dairələrdə belə bu çıxışa açıq etiraz müşahidə olunmadı. Bu isə göstərir ki, Kralın mesajı partiyalarüstü rezonans yaratmaq qabiliyyətinə malikdir. ABŞ daxilində isə o, xüsusilə demokratlar və mötədil respublikaçılar arasında rəğbət qazanır.

Buna baxmayaraq, onu Trampın “əsas siyasi rəqibi” kimi təqdim etmək analitik baxımdan şişirtmə olar. Çünki Kral konstitusion monarxdır və birbaşa siyasi rəqabət subyekti deyil. Lakin onun simvolik təsir gücü və beynəlxalq auditoriyaya çıxışı, müəyyən mənada, siyasi diskursu formalaşdırmaq potensialına malikdir”.

News365.az