Fransada yanacaq böhranı: qiymətlər rekord həddə çatdı

Fransada sürücülər üçün yanacaq tapmaq getdikcə ciddi problemə çevrilir. Ölkə üzrə yüzlərlə yanacaqdoldurma məntəqəsində ehtiyatların tükənməsi fonunda benzin və dizelin qiyməti də kəskin bahalaşıb.

News365.az “Actu.fr”ə istinadən xəbər verir ki, sentyabrın 17-də Fransada “SP95” markalı benzinin orta qiyməti litri 2,22 avroya, dizelin qiyməti isə 2,36 avroya yüksəlib. Bu göstəricilər yanacaq bazarında son dövrün ən yüksək qiymətləri sırasındadır.

Vəziyyəti daha da çətinləşdirən məqamlardan biri isə yanacaq qıtlığıdır. Hökumətin məlumatına əsasən, sentyabrın 16-da ölkədəki yanacaqdoldurma məntəqələrinin təxminən 10 faizində ən azı bir yanacaq növü tükənib. Bu stansiyaların böyük hissəsinin “TotalEnergies” şəbəkəsinə aid olduğu bildirilir.

“TotalEnergies”in bəzi stansiyalarında qiymətlər digər məntəqələrlə müqayisədə daha aşağı – benzin üçün 1,99 avro, dizel üçün isə 2,25 avro səviyyəsində saxlanılıb. Lakin ucuz yanacaq təklif edən stansiyaların bir çoxunda ehtiyatların tükənməsi sürücülərin seçim imkanlarını məhdudlaşdırıb.

Məlumata görə, ötən həftə ərzində təxminən 1200 yanacaqdoldurma məntəqəsində yanacaq ehtiyatı tükənib. Hazırda isə 1800-dən çox stansiyada ən azı bir yanacaq növünün çatışmazlığı qeydə alınır.

Qiymət artımı son bir ildə xüsusilə nəzərəçarpacaq həddə çatıb. Dizelin qiyməti əvvəlki illə müqayisədə 44 faizdən çox, “SP95” benzinin qiyməti isə 28 faizdən artıq bahalaşıb. Bu, dizelin hər litri üçün təxminən 72,7 sent, benzində isə 49 sentlik artım deməkdir.

Beləliklə, Fransada sürücülər eyni vaxtda həm yüksək qiymətlər, həm də yanacaq qıtlığı ilə üz-üzə qalıblar.