Alim Qasımovdan rep oxuduğuna görə onu tənqid edənlərə REAKSİYA – VİDEO

Son günlər sosial şəbəkələrdə xalq artisti, dünya şöhrətli muğam ustası Alim Qasımovun bir el şənliyində rep ifa etməsi ilə bağlı yayılan görüntülər geniş müzakirələrə səbəb olub. Sürətlə yayılan video müxtəlif tənqidi fikirlərlə qarşılanıb və ictimaiyyət arasında maraqlı reaksiyalara səbəb olub.

Bəzi sosial media istifadəçiləri bu addımı sənətkarın müasir trendlərlə ayaqlaşmaq bacarığı kimi qiymətləndirərək alqışlayıblar. Digər tərəfdən isə, bəzi izləyicilər rep ifasını sənətkarın klassik muğam üslubuna uyğun olmayan bir eksperiment kimi dəyərləndirərək tənqid ediblər. Onlar hesab edirlər ki, belə bir sənət irsi daşıyıcısının bu janra müraciət etməsi uyğun deyil.

Xalq artisti Alim Qasımov məsələyə münasibət bildirib. O, həmin ifanın əvvəlcədən planlaşdırılmadığını və sadəcə olaraq dostcasına, zarafatla baş tutduğunu deyib:

“Əlbəttə, bu bir zarafat idi. Hər şey təbii şəkildə baş verdi, planlaşdırılmış bir şey deyildi. Bir az əyləncə olsun deyə improvizə etdim. Amma görünür ki, zarafat ciddi müzakirəyə çevrildi. Söhbət bağlansın artıq,” – deyə sənətkar bildirib.

Qeyd edək ki, Alim Qasımov Azərbaycan musiqi mədəniyyətinin ən tanınmış simalarından biri olaraq həm ölkə daxilində, həm də beynəlxalq arenada muğam sənətinin təbliğində müstəsna rol oynayıb.  Onun bu cür spontan çıxışları da sənətkarın sənətə olan yaradıcı yanaşmasının təzahürü kimi qiymətləndirilə bilər.