Trampdan sərt mesaj: Putin üçün vaxt 12 günə endirildi

ABŞ prezidenti Donald Tramp Rusiya lideri Vladimir Putinə Ukrayna ilə atəşkəslə bağlı danışıqlar aparmaq üçün verdiyi müddəti qısaltmaq niyyətində olduğunu bildirib.

News365.az xarici agentliklərə istinadən xəbər verir ki, Tramp bunu Böyük Britaniyanın baş naziri Kir Starmerin iştirakı ilə Törnberridə (Şotlandiya) birgə mətbuat konfransı zamanı deyib.

Amerika lideri bir daha qeyd edib ki, Putindən çox məyus olub. Başqa bir nəticədə, 50 gündən sonra Tramp Rusiyaya qarşı ikinci dərəcəli sanksiyalar tətbiq edəcəyinə söz verib:

“Biz müzakirələr apardıq və düşündük ki, artıq bir neçə dəfə qərara gəlmişik. Və sonra Putin çıxıb Kiyev kimi hansısa şəhərə raketlər atmağa başlayır, çoxlu insanı öldürür və mən deyirəm: bunu etməyin. Ona görə də görək nə olacaq”.

Donald Tramp həmçinin əlavə edib ki, Kreml rəhbərinə verdiyi 50 günlük ultimatumu yenidən nəzərdən keçirəcək, çünki “o, artıq cavabını bildiyini düşünür”.

O qeyd edib ki, o, artıq Putinlə dörd dəfə danışıb və müharibənin “çox dəfə” həll oluna biləcəyini düşünüb. Ukrayna, onun təbirincə desək, genişmiqyaslı müharibəni dayandırmaq üçün “nəsə etmək istəyir”sə də, "Rusiyadan eşitdiyiniz yalnız söhbətdir”.

Trampın sözlərinə görə, yeni dedlayn 10-12 gün olacaq.

Politoloq Şahin Cəfərliyə görə, bir gün əvvəl ABŞ və Avropa İttifaqı arasında ticarət anlaşması əldə edilməsi də Ukrayna məsələsində Qərbin vahid mövqedən çıxış etməsinə təsir göstərən önəmli hadisədir:

“Razılığa əsasən, Aİ qarşıdakı 3 ildə ABŞ-dan hər il 250 milyard dollarlıq təbii qaz, neft və digər enerji daşıyıcıları alacaq və ABŞ iqtisadiyyatına 600 milyard dollar investisiya qoyacaq. Bununla yanaşı, Aİ ABŞ-dan milyardlarla dollarlıq silah alaraq Ukraynaya ötürəcək.

Bu anlaşma Trampın Avropadakı ideoloji müttəfiqləri olan radikal sağçı partiyalar tərəfindən tənqidlə qarşılanıb. Putin rejiminin Avropaya müharibə, qan, göz yaşı gətirdiyini və strateji situasiyanın bu səbəbdən dəyişdiyini qəbul etmək istəməyən Avropa antisistemi Rusiya ilə enerji sahəsində əməkdaşlığı davam etdirməyə tərəfdar çıxaraq Aİ liderlərini ABŞ-dan baha qiymətə xammal almaqda ittiham edir. Bu, qeyri-əxlaqi mövqe olmaqla bərabər, Tramp komandasının iqtisadi siyasətini də baltalamağa yönəldiyindən, respublikaçı administrasiya ilə həmin qüvvələrin ideoloji yaxınlığının praktik əhəmiyyətini azaldacaq”.