"Təhsil sistemimiz uşaqlarda və gənclərdə xətti təfəkkür formalaşdırır"- Ekspert

Bir milləti məhv eləmək istəyirsənsə ilk növbədə təhsilini əlindən almaq lazımdır. Çox təəssüf ki, Azərbaycanın təhsil sistemi eksperimentlər poliqonuna çevrilib. Bu səbəbdən də təhsilimiz labirintə düşüb. Qarşıda isə işıq görünmür.

Mövzu ilə bağlı danışan təhsil üzrə ekspert Etibar Əliyev deyir ki,  dünya siyasətinin arxitektoru, Sülh üzrə Nobel mükafatı laureatı Henri Kissincer əsərlərinin birində polimat (yunan dilində “çoxelmlilik”) anlayışına geniş yer verib:

“Polimat-müxtəlif elm sahələri: ədəbiyyat, incəsənət, təbiət elmləri, mədəniyyət sahələrində dərin idraka malik olan şəxsdir. Onları çox vaxt universal və intellektual insan da adlandırırlar. Kissincerə görə Leonardo da Vinçi, İbn Sina, B. Franklin, M. Lomonosov, əl-Xorezmi, İbn Rüşd, İmmanuil Kant polimat olublar.

Sonradan şəxsi kitabxanaların miqyası böyüdükcə polimatların sayı artmağa başladı. U. Eko, R. Dokkinz, Medavar, V. Heyzenberq, Çarlz Snou və başqaları əsl polimatlardır.

Biz belə adamlara sarkazmla yanaşır və onları "hərşeyşünas" adlandırırıq.

Azad Mirzəcanzadə əsl polimat idi. Onun əsərlərini oxuyanlar bu xətti açıq-aşkar görürlər. Səbəbi onun universal kitabxanası və dərin idrakı idi.

Bizim orta və ali təhsil sistemi uşaqlarda və gənclərdə xətti təfəkkür formalaşdırır. Müəllimlər idrakın genişləndiriməsi üçün vacib əlavə ədəbiyyatlar tövsiyə edə bilmirlər. Çünki özləri oxumurlar. Məktəb və universitet kitabxanalarında mütaliə kursları keçilməlidir. Belə bir kursu apara biləcək bir neçə şəxs var. Lakin maraq yoxdur. Belə getsə heç olmayacaq da! Səbəb sadədir: narsisizm xəstələyi buna imkan vermir”.

News365.az