Tayvan şirkətlərindən ABŞ-yə növbəti milyardlıq çip gedişi: Süni intellekt bumu yeni xərclər tələb edir

Tayvan şirkətləri ABŞ-də süni intellekt texnologiyalarının inkişafı və yarımkeçirici istehsalının genişləndirilməsi üçün əlavə 20 milyard dollar investisiya qoymağa hazırlaşır.

News365.az xəbər verir ki, bu barədə “Reuters” məlumat yayıb.

Tayvanın iqtisadiyyat naziri Kunq Min-hsinin sözlərinə görə, yeni investisiya qərarının əsas səbəblərindən biri süni intellekt tətbiqlərinə qlobal tələbatın sürətlə artmasıdır.

İnvestisiya yatıracaq şirkətlərin adları açıqlanmayıb. Bununla belə, vəsaitin əsasən ABŞ-də çip istehsalının artırılmasına və texnoloji istehsal imkanlarının genişləndirilməsinə yönəldiləcəyi bildirilir.

Bu təşəbbüs ABŞ-nin ölkə daxilində yarımkeçirici istehsalını gücləndirmək və texnologiya təchizat zəncirini şaxələndirmək siyasəti ilə də üst-üstə düşür. Prosesdə CHIPS proqramı mühüm rol oynayır.

Tayvanın aparıcı çip istehsalçısı TSMC də ABŞ bazarındakı investisiyalarını əhəmiyyətli dərəcədə artırır. Şirkət iyul ayında ABŞ-dəki layihələrinə əlavə 100 milyard dollar sərmayə yatıracağını açıqlayıb. Bununla TSMC-nin ABŞ-də planlaşdırdığı ümumi investisiyanın həcmi 265 milyard dollara yüksəlib.

Süni intellekt texnologiyalarının sürətli inkişafı qabaqcıl prosessorlara və yaddaş çiplərinə olan tələbatı kəskin artırır. Bu tendensiya isə yarımkeçirici sektorunu qlobal texnoloji rəqabətin əsas sahələrindən birinə çevirir.