Startaplara diqqət niyə qənaətbəxş deyil?!

Azərbaycan hökuməti İKT (İT) sektorunu prioritet elan edib, doğrudan da, bu sahəyə ciddi vergi güzəştləri var, qurumlar dəstək göstərməyə çalışır. Amma, ölkədə iqtisadi və hüquqi sistemin işləmə qaydaları, ayarları yanlış olduğu üçün bu sahədə də ciddi nailiyyətlər görmürük.

Mövzu ilə bağlı danışan iqtisadçı Natiq Cəfərli deyir ki, ölkədə qeydiyyatda olan 150–160 aktiv startap mövcuddur:

“Azərbaycanın startap ekosisteminin ümumi dəyəri, təxminən, 590 milyon dollar civarında qiymətləndirilir.

Startapların maliyyələşməsi hələ ki, çox kiçik miqyasdadır. Keçən il 22 yerli startap cəmi 2.62 milyon dollar investisiya cəlb edə bilib.

Ölkədə aktiv fəaliyyət göstərən 3 əsas vençur fondu var: Caucasus Ventures, INMerge Ventures və Tumar Ventures. Onların ümumi kapitalı təxminən 11 milyon dollar təşkil edir.

Bu il, 2026-cı ildə İKT sektoruna qoyulan investisiyaların ümumi həcmi isə cəmi 175 mln. dollar olub.

Dost Qazaxıstanda bir startap var – “Higgsfield”, süni intellekt əsasında video yaratma platformasıdır. Təsisçilərdən biri gənc İT mütəxəssisi Aleks Maşrabovdur.

Startap ötən həftə yeni investisiya raundunda 400 milyon dollar cəlb edib. Bu gün “Higgsfield” startapının bazar dəyəri 5,4 milyard dollara çatıb. Hə, onu da deyim ki, “Higgsfield” startapı, şirkəti cəmi 1,5 il öncə təsis edilib”.

News365.az