Rusiya Nikolayev və Lvov şəhərlərinə zərbə endirdi - VIDEO

29 iyun gecəsi Ukraynanın bir çox bölgəsində, o cümlədən Nikolayev və Lvov şəhərlərində güclü partlayış səsləri eşidilib.

Bu barədə Ukrayna mətbuatı yazıb.

Mənbə qeyd edir ki, bu, Rusiyanın hücum dalğasının bir hissəsi olub.

Eyni vaxtda bütün Ukrayna ərazisində hava həyəcanı elan edilib. Rəsmi məlumatlara əsasən, həyəcan siqnalları Bakı vaxtı ilə saat 03:20-dən etibarən qüvvədə olub. Bu barədə əhaliyə xəbərdarlıq etmək üçün nəzərdə tutulmuş Ukraynanın rəsmi operativ xəbərdarlıq sistemi məlumat yayıb.
 

Qeyd edək ki, bundan bir neçə saat öncə – 27 iyun gecəsi saat 23:45 radələrində Ukraynanın digər sahilyanı şəhəri Odessada da güclü partlayışlar baş verib. Yerli mənbələrin məlumatına görə, azı beş hava zərbəsi endirilib. Həmin vaxt Odessada da hava həyəcanı siqnalı verilmişdi.

Şəhərin bəzi rayonlarında partlayışlardan sonra yanğın baş verdiyi bildirilib. Lakin yanğının dəqiq yeri və nəticələri barədə rəsmi açıqlama verilməyib.

Ukrayna ərazisində bu cür hava hücumları və partlayışlar gecənin sakitliyini pozaraq əhalidə geniş təşviş yaradıb. Sosial şəbəkələrdə istifadəçilər sığınacaqlara qaçdıqlarını, güclü səs-küylər və titrəmələrin müşahidə olunduğunu yazırlar.