Qoyun otaran çoban deputatın qızını qaçırdı

Braziliyalı millət vəkili Roberto Alvesin qızı Kamila Alves ailəyə məxsus mal-qara fermasında işləyən çoban Lukas Silva tərəfindən qaçırılıb. Bölgə üzrə başladılan əməliyyat nəticəsində şübhəli ştat sərhədinə yaxın dağ evində aşkarlanaraq saxlanılıb və hüquq-mühafizə orqanlarına təhvil verilib.

 Rio-Verde kənd ərazisində yerləşən fermada heyvanlara qulluq edən Lukas Silva bazar günü gec saatlarda Kamila Alves ilə birlikdə ərazini tərk edib. İşçilər və hadisənin şahidləri vəziyyəti aşkar etdikdən sonra millət vəkilinin ailəsi dərhal təhlükəsizlik qüvvələrinə məlumat verib.

Qoyas ştatının deputatı Roberto Alves qızının zorla saxlanıldığını bildirərək polis qüvvələrini hərəkətə keçirib. Hadisəni pul almaq məqsədli qaçırılma və hücum kimi qiymətləndirən Alves şübhəlinin təcili tutulması üçün ştat ərazisində axtarış əməliyyatlarının genişləndirilməsini tələb edib.

Ştat polisi daxil olan məlumatdan sonra bölgədə texniki və fiziki müşahidəyə başlayıb. Əməkdaşların apardığı araşdırmalar nəticəsində cütlüyün Mato-Qrosso-du-Sul ştatının sərhədinə yaxın qəsəbədə, kənd ərazisində yerləşən dağ evində gizləndiyi müəyyən edilib.

Ünvana basqın edən təhlükəsizlik qüvvələri çobanı nəzarətə götürərək saxlayıblar.

Əməliyyatdan sonra ilkin ifadəsi alınan Kamila Alves zorla qaçırılmadığını, Lukas Silva ilə qarşılıqlı razılıq əsasında birlikdə qaçdıqlarını bildirib.

Alves ailəsinin onu başqa bir siyasətçinin oğlu ilə evlənməyə məcbur etdiyini, sevgilisi ilə birlikdə öz həyatlarını qurmaq üçün bu addımı atdıqlarını ifadəsində qeyd edib.

Millət vəkili Roberto Alves şikayətini geri götürmədiyi üçün Silva barəsində başladılan hüquqi araşdırma davam edir.