Qeybdən gələn təhlükə – Pilotların qarşısında 10 metrlik naməlum - VİDEO

ABŞ-nin Ohayo ştatı üzərində uçuş həyata keçirən mülki təyyarənin pilotları səmada naməlum uçan obyekt (UNO) müşahidə etdiklərini bildiriblər.

 UFO hadisələrini araşdıran Milli Mərkəz (NUFORC) 2026-cı il avqustun 16-da baş vermiş hadisə ilə bağlı pilotların hesabatını yayımlayıb.

Məlumata görə, mülki təyyarə təxminən 12 min metr yüksəklikdə uçarkən pilotlar özlərindən təqribən 1000 metr yuxarıda qəribə obyekt görüblər.

Uzunluğu təxminən 10 metr olan obyekt hamar, gümüşü rəngdə və uzunsov həb formasında təsvir edilib. Pilotların sözlərinə görə, onun səthində heç bir əyrilik, qat və ya çıxıntı olmayıb.

Ən diqqətçəkən məqam isə naməlum obyektin təyyarənin toqquşma xəbərdarlığı sistemi tərəfindən qeydə alınmamasıdır. Bundan başqa, yaxınlıqdakı hava limanının dispetçeri də obyekti radarda aşkar edə bilməyib.

Pilotlardan biri naməlum obyektin güclü tufan buludlarının arasından çıxdığını ehtimal edib.

Onun fikrincə, belə hava şəraitində obyektin adi hava şarı olması mümkün deyildi. Çünki həmin yüksəklikdə və meteoroloji şəraitdə hətta təyyarələr də mühərriklərin buz bağlaması və güclü turbulentlik təhlükəsi ilə üzləşə bilərdi.

Hadisə ilə bağlı məlumat NUFORC tərəfindən dərc olunub. Obyektin mənşəyi və nə olduğu müəyyənləşdirilməyib.