Millət vəkilindən avtomobil bazarındakı süni qiymət artımına REAKSİYA

Bayram yaxınlaşdıqca qiymətlər artır. Əslində qiymət artımı üçün səbəb də yoxdur. Sadəcə bayram ərəfəsində qiymət artımı bizdə dəb halını alıb. Ən pisi də odur ki, qiymət artımı daha çox psixoloji amillə bağlı olur. Məsələn, elektrik və hibrid avtomobillərin idxalına tətbiq edilən vergi güzəştləri 2026-cı ilin 1 yanvarından ləğv olunacaq. Lakin bu qərar dövriyyəyə buraxılandan həmən sonra qeyd edilən, xüsusən də Çindən gətirilən avtomobillərin qiymətində 10-15 faiz bahalaşma oldu.

Ekspertlərin fikrinə görə ilin sonuna qədər bu qiymət artımı 25-30 faizə qədər artacaq.

Maraqlıdır ki, vergi güzəştləri qüvvədə olduğu bir zamanda bu qədər qiymət artımı necə baş verə bilir?

Məsələyə münasibət bildirən Millət vəkili Fazil Mustafa News365.az-a bildirib ki, avtomobillərdə süni qiymət artımı böyük problemlər yaradır:

“Əslində hökümət vergi güzəştlərini etməklə “yaşıl iqtisadiyyat”a keçidi sürətləndimək istəyirdi. Amma tənzimləmələrdəki müəyyən məsələlər bəzi problemləri ortaya çıxardı. Nəticədə gətirilən yeni avtomobillərin çox hissəsi Bakıda toplandı. Bu da tıxacların böyüməsinə səbəb oldu. Belə məsələlərdə doğru tənzimləmədən çox şey asılıdır. Biz hələ ki, problemin tam və doğru şəkildə tənzimlənməsinin yolunu tapa bilməmişik. Hesab edirəm ki, bu məsələ elə tənzimlənməlidir ki, həm paytaxta süni şəkildə yaradılan tıxacların qarşısı alınsın, həm də qiymətlər insanlar üçün əlçatan olsun. Hər bir qiymət artımının iqtisadi əsası olmalıdır. Bu günki qiymət artımında isə biz bunu görmürük”.

News365.az