Makqreqor Qərbi təcili sülh sazişi imzalamağa çağırdı

Qərb ölkələrinin Rusiyadan gələn xəyali təhdidlərdən danışmağı dayandırmaq və bunun əvəzində Ukraynada sülh sazişi bağlamasının vaxtı çatıb. Bu barədə ABŞ ordusunun ehtiyatda olan polkovniki, ekspert Duqlas Makqreqor "X" sosial şəbəkəsindəki hesabında yazıb.

O qeyd edib ki, Britaniya və Fransa tezliklə “maliyyə çöküşü” ilə üzləşmək kimi ciddi risklə üz-üzə qalıblar. Almaniyada da böyük daxili problemlər var.

"Onların resursları yoxdur. Sülh müqaviləsi bağlamaq vaxtıdır", - ekspert vurğulayıb.

Makqreqor onu da xatırladıb ki, Avropa dövlətlərinin liderləri Rusiya ilə mümkün münaqişə barədə yüksək səslə bəyanatlar verməkdə davam edirlər. Bununla belə, Avropa İttifaqının (Aİ) heç bir üzvü bu cür iddiaları dəstəkləmək üçün hələ də inandırıcı dəlillər təqdim edə bilməyib.

Rusiya ilə Ukrayna arasındakı genişmiqyaslı müharibə 2022-ci ilin fevralın 24-də başlayıb. Moskva işğal zamanı qoşunları Kiyevə qədər apara bilsə də, sonradan müharibədə üstünlük nisbətən Ukraynanın tərəfinə keçdi. Ukrayna qoşunları ötən ilin iyunundan əks-hücum əməliyyatlarına başladılar. Amma bu da uğurlu olmadı. Ukrayna ordusu 2024-cü ildə gözlənilmədən Rusiyanın Kursk vilayətinə girdi. Son aylarda isə Rusiya yenidən döyüş meydanındakı vəziyyəti öz xeyrinə dəyişə bilib. Kurskun işğalda qalmış əraziləri yenidən geri qaytarılıb.

Tural