İsrail ordusunda həyəcan: Baş Qərargah rəisi ABŞ səfərini ləğv etdi

Yaxın Şərqdə təhlükəsizlik vəziyyətinin gərgin olaraq qaldığı bir vaxtda İsrail ordusunda yüksək döyüş hazırlığı rejimi davam edir. Bu fonda İsrail Müdafiə Ordusunun Baş Qərargah rəisi Eyal Zamir ABŞ-yə planlaşdırılan səfərindən imtina edib.

News365.az xəbər verir ki, bu barədə İsrail mediası məlumat yayıb.

Məlumata görə, Zamirin səfər çərçivəsində ABŞ Mərkəzi Komandanlığının (CENTCOM) komandanı və ABŞ Silahlı Qüvvələrinin Birləşmiş Qərargah Rəisləri Komitəsinin sədri ilə görüşləri nəzərdə tutulub.

Görüşlər zamanı iki ölkə arasında hərbi əməkdaşlığın vəziyyəti, İran ətrafında cərəyan edən proseslər və digər təhlükəsizlik məsələlərinin müzakirəsi planlaşdırılıb.

Lakin İsrail ordusunun Baş Qərargah rəisi hazırkı şəraitdə ölkədən kənara çıxmasının məqsədəuyğun olmadığını bildirib. O, bütün istiqamətlərdə yüksək döyüş hazırlığının saxlanıldığını nəzərə alaraq İsraildə qalmağa qərar verib.

“Eyni vaxtda həm orduya rəhbərlik etmək, həm də xaricə getmək qeyri-mümkündür”, – deyə Zamir bildirib.

Qeyd olunur ki, Zamir bundan əvvəl İsrail ordusunun döyüş hazırlığı səviyyəsinin artırılması barədə göstəriş verib. O, həmçinin təhlükəsizlik baxımından həssas dövr hesab olunan Tişrey bayramı ərəfəsində yüksək rütbəli komandirlərə öz postlarını tərk etməmələri barədə tapşırıq verib.

Beləliklə, ABŞ ilə planlaşdırılan hərbi görüşlərin Zamirin iştirakı olmadan və ya daha sonrakı tarixdə keçirilməsi məsələsi gündəmdə qalıb.

News365.az