İran XİN: Tehran heç vaxt nüvə silahı hazırlamayacaq

İran nüvə silahı istehsal etməyəcək, çünki bu, ölkə rəhbərliyi tərəfindən qadağan edilib.

News365.az xəbər verir ki, İran Xarici İşlər Nazirliyinin rəsmi nümayəndəsi İsmail Bəqayi bunu iranlı deputat Məhəmməd Qasim Osmaninin Qərblə danışıqlarda “bərabərliyi” təmin etmək üçün nüvə silahı hazırlamaq təklifini şərh edərkən deyib.

“İran heç vaxt və heç bir halda nüvə silahı hazırlamaq yolunu tutmayacaq. Bu, ölkənin Ali rəhbəri Ayətullah Əli Xameneinin fətvasına əsaslanan strategiyamızın tərkib hissəsidir. Bu məsələdə heç bir şübhə yoxdur və ola da bilməz”, - deyə diplomat jurnalistlər üçün keçirilən brifinqdə bildirib.

Qeyd edək ki, İran İslam Respublikasında nüvə silahının hazırlanması 2003-cü ildə Ayətullah Əli Xameneinin fərmanı ilə rəsmən qadağan edilib.