İqtisadiyyat Nazirliyindən 21 milyonluq tender- Kim qalib olacaq?

İqtisadiyyat Nazirliyi nəhəng bir İT layihəni tenderə çıxarıb. Layihə Milli Məkan Məlumatları İnformasiya Sisteminin yaradılmasını nəzərdə tutur. Tenderin ehtimal olunan qiyməti 21 milyon 881 min 253 manatdır. Bu layihə ölkə miqyasında coğrafi məlumatların toplanması, saxlanması, emal edilməsi və istifadəsi üçün nəzərdə tutulan bir informasiya sistemini yaratmağı hədəfləyib.

Mövzu ilə bağlı News365.az–a danışan Azərbaycan İnternet Forumunun prezidenti Osman Gündüz deyib ki, bir neçə il öncə qəbul edilən qanunvericilikdə Milli Məkan Məlumatları İnformasiya Sisteminin yaradılması nəzərdə tutulsa da, indiyədək bunu reallaşdırmaq mümkün olmayıb:

“Hiss olunurdu ki, bu məsələdə müxtəlif qruplar arasında maraq toqquşmaları var. Tenderə kimlərin qatılacağını demək çətindir. Cəmi bir-iki İT şirkətimiz var ki, buna iddia edə bilər. Bilmək olmaz, bəlkə də İsrail, yaxud Türkiyə şirkətlərinə həvalə edilə bilər bu layihə. Hansı ki, milli təhlükəsizlik baxımından bu, elə də uğurlu variant olmaya bilər”.

Qeyd edək ki, tenderin qalibi 16 noyabrda bilinəcək.

News365.az