Gömrük Komitəsinin səlahiyyətlərinin artırılması iqtisadiyyatı çökdürür?

“Hökumət, deyəsən, qərar verib ki, insanların, biznesin, sahibkarların pozitiv gözləntilərinin əksinə olan nə varsa, həmin addımları atsın. Uzun zamandır müzakirə olunurdu ki, Azərbaycanda Gömrük Komitəsinin ayrıca, müstəqil, özü də rütbəli məmurlardan ibarət olan qurum kimi fəaliyyətinə ehtiyac yoxdur. Çoxdan təklif var ki, Komitə ya Maliyyə, ya da İqtisadiyyat nazirliyinə birləşdirilsin, həbri rütbələr ləğv edilsin, Gömrük gözə görünməz, iş adamlarına mane olmayan, nazirliklərin birinin tərkibində departament kimi fəaliyyət göstərsin, bir çox səlahiyyətləri azaldılsın”.

News365.az xəbər verir ki, bu fikirləri iqtisadçı ekspert Natiq Cəfərli deyib.

O. bildirib ki, bəzi hökuməti dəstəkləyən deputatlar da bu təklifə isti baxdıqlarını publik çıxışlarında söyləyirdilər:

“Amma və lakin Gömrük komitəsinin səlahiyyətlərini kəskin artıran yeni qərarlar gəlir – Komitə bundan sonra iş adamlarına ölkədən çıxışa “stop” qoya biləcək, “brokerlər” anlayışını rəsmiləşdirərək, adını "dolayı gömrük təmsilçiliyi" qoyacaqlar, onların Komitə daxilində reyestri yaranacaq, Gömrük Komitəsi kimi istəsə həmin siyahıya salacaq, kim istəsə o siyahıdan çıxaracaq və fəaliyyətləri Gömrük komitəsinin iki dodağı arasından keçəcək.

Azərbaycan Respublikasının Konstitusiyası var, orada insanların səyahət sərbəstliyi maddəsi, bu maddənin Dövlət tərəfindən qorunması öhdəliyi var. Zatən 5 ildir quru sərhədləri bağlı saxlayıblar, zatən bir neçə dövlət-hökumət qurumuna Ana Yasada təsbit olunan hüququn məhdudlaşdırma səlahiyyəti tanıyıblar, indi də belə bir “stop” düyməsini Gömrük Komitəsinə verirlər – olmaz belə, Vallah olmaz...”

News365.az