"Ermənistanda vahid iradənin həyata keçirilməsi, Qərbin maraqlarına ziddir"- Anar Əliyev

"Bu gün Ermənistanda stabil hakimiyyətin və vahid iradənin həyata keçirilməsi, siyasi iradənin gerçəkləşdirilməsi Qərbin maraqlarına qəti şəkildə uyğun deyil. Çünki Qərb üçün güclü Ermənistan hakimiyyəti, Qərbin Cənubi Qafqazda oynadığı və oynamaq istədiyi destruktiv rola tamamilə ziddir."

Politoloq Anar Əliyev bu sözləri News365.az-a deyib. 

"Əgər Ermənistanda hakimiyyət güclü olacaqsa, hakimiyyət xalqa əsaslanacaqsa və xalq hakimiyyətin verdiyi qərarları qəbul edəcəksə, o zaman bu qərarlar daha çox Azərbaycanın irəli sürdüyü tələblər əsasında formalaşacaq. Bu tələblər isə 44 günlük Vətən müharibəsinin və 19-20 il əvvəl həyata keçirilmiş antiterror tədbirlərinin nəticələrinin qanuniləşdirilməsi, sənədlər üzərində təsdiqlənməsi və imzalanması ilə öz təsdiqini tapacaqdır.

Belə bir vəziyyət – yəni həmin iki müharibə və antiterror tədbirlərinin yaratdığı reallıqlar – kimin maraqlarına ziddir? Qərbin. Çünki Qərb bu halda Cənubi Qafqazda təsir imkanlarını itirmiş olacaq. Belə olan halda, Ermənistan ilə Azərbaycan arasında nəqliyyat və kommunikasiya yolları açılacaq. Zəngəzur dəhlizi birbaşa reallaşacaq ki, bu da Azərbaycanın, Türkiyənin və Rusiyanın Cənubi Qafqazda təsir imkanlarını genişləndirəcək.

Xüsusilə də, “Qərb” dedikdə mən Avropanı fərqləndirmək istəyirəm. Avropa və onun təsisatları dünyanın bir çox bölgələrində – məsələn, Ukraynada, Yaxın Şərqdə, eləcə də Cənubi Qafqazda artıq aparıcı aktor rolunu tədricən itirməkdədir."- deyə fikirlərini bildirib.