"İranın ətrafında çoxsaylı ABŞ hərbi bazaları var"- Şair Ramaldanov

"Düşünürəm ki, İsrailin İrana hücumları Birləşmiş Ştatların dəstəyi və köməyi olmadan yalnız bir variantda ola bilər."

Bu sözləri News365.az-a hərbi ekspert, ehtiyatda olan polkovnik Şair Ramaldanov deyib.

"Hava məkanına zərbə endirərkən, İsrailin vasitələri yetərlidirmi, yetərli olacaqmı? Hansı hədəflər nəzərdə tutulur? O hədəflərə ayrılan zərbə vasitələri kifayət qədər olacaqmı? Əgər həmin vasitələr dərhal o hədəflərə dəyməsə, onların gücləndirilməsi prosesi nə qədər çəkəcək?

Təbii ki, İsrailin arxasında ABŞ dayanacaq. Lakin ABŞ-ın bu prosesdə açıq şəkildə necə iştirak edəcəyi sual altındadır. Niyə? Çünki İranın ətrafında çoxsaylı ABŞ hərbi bazaları var. Belə bir vəziyyətdə, əgər ABŞ açıq şəkildə iştirak edərsə, həmin hərbi bazalara zərbə endirilməməsi mümkün deyil. Burada proksi qüvvələr də iştirak edəcək, İranın hücumu da baş verəcək. Ona görə düşünürəm ki, əgər zərbə endiriləcəksə, bunun İsrail vasitəsilə endirilməsini istisna etmirəm. ABŞ bunu dəstəkləyəcək. Əgər bu dəstək kifayət qədər olmasa və açıq hava zərbələrinə ABŞ tərəfindən iştirak tələb olunarsa, o zaman ABŞ açıq şəkildə bu prosesdə iştirak edəcək."