Rusiyanın “Ukrayna Qərbə inteqrasiya edə bilməz” deməyə haqqı varmı?- Politoloqdan şərh
"Əvvəlcə atəşkəsin elan edilməsi və atəşkəs dövründə, bundan əvvəl Donald Trampın seçkisiz diktator adlandırdığı Zelenskinin yerinə növbədənkənar seçkilərin keçirilməsi, həmçinin onun nüfuzunun aşağı düşdüyü hazırkı şəraitdə proseslərə, xüsusən də Rusiya ilə danışıqlara daha loyal yanaşan bir şəxsin hakimiyyətə gətirilməsi məsələsi dayanır. İndi bunun nə dərəcədə reallaşacağını söyləmək çətindir, amma hər halda əsas məqsəd budur."
Politoloq Xəyal Bəşirov bu sözləri News365.az-a şərh edib.
"Düşünürəm ki, Zelenskinin nüfuzunun azalmasının əsas səbəblərindən biri də Ukrayna vətəndaşlarının belə bir sual verməsidir: əgər biz bu qədər iqtisadi və maddi baxımdan Avropadan və Amerikadan asılı idiksə, niyə üç il əvvəl müharibə başladı? Və ya niyə alternativ, diplomatik yollar seçilmədi? Zelenski isə bu suala cavab verməkdə çətinlik çəkir.
Rusiyanın “Ukrayna Qərbə inteqrasiya edə bilməz” deməyə haqqı varmı?
Qısa şəkildə desək, əgər bu, iki müstəqil dövlətdirsə, bir dövlət digər dövlətə hansısa məsələni diktə edə bilməz. Amma nəzərə alsaq ki, bu gün dünyada müstəqil dövlətlər sadəcə görüntü olaraq mövcuddur və bu görüntünün arxasında müxtəlif güc mərkəzləri dayanır, məsələ daha mürəkkəb görünür."
