"Vasitəçi olmadan sərhədlərimizi müəyyənləşdirdik və yekunlaşdırdıq"- Naqif Həmzəyev

"Görürsünüz ki, biz heç bir vasitəçi olmadan sərhədlərimizi 13 kilometr uzunluğunda müəyyənləşdirdik və bu prosesi 2024-cü ildə yekunlaşdırdıq."

Bu fikirlər News365.az-a Milli Məclisin deputatı Naqif Həmzəyev deyib. 

"Bu, həqiqətən də çox böyük bir irəliləyiş idi. Lakin bundan sonrakı ərazilərdə bu prosesin icrası, təbii ki, çətin iş şəraitində həyata keçiriləcək. Çünki delimitasiya və demarkasiya məsələləri elə də asan proses deyil. Orada hər santimetr uğrunda, hər santimetr üçün bəzən aylarla, bəlkə də illərlə danışıqlar aparılır. Yəni 500-600 metr ərazi əslində heç də az deyil.

Bu baxımdan, məsələn, hələ də işğal altında olan kəndlərimiz var. Onlar qaytarılmır. Bundan başqa, mübahisəli ərazilər mövcuddur. Təbii ki, Ermənistan tərəfi həmin ərazilərdən dərhal çıxmalıdır. Bundan əlavə, Sovet dövründə heç bir sənəddə qeyd olunmayan, lakin işğal olunmuş bəzi torpaqlar var ki, Ermənistanın nəzarətinə keçib. Həmin ərazilərin də qaytarılması mütləq təmin olunmalıdır.

Bir sözlə, düşünürəm ki, bu proses hələ uzun illər davam edəcək. Ancaq istənilən halda, əksər yerlərdə Ermənistan tərəfi Azərbaycan tərəfinin şərtlərini qəbul etməli olacaq. Təbii ki, bu xəbəri Ermənistan tərəfi yaymaqla bir növ Azərbaycanı da buna hazırlamaq istəyir. Onların da bəzi ideyaları və istəkləri var ki, bəzi ərazilərdə Azərbaycan tərəfi geri çəkilə bilər. Lakin düşünürəm ki, Azərbaycan Silahlı Qüvvələri Ermənistan-Azərbaycan sərhədində mövqelərini möhkəmləndirib və bəzi strateji əraziləri tam nəzarətə götürüb."- deyə fikirlərini bildirib.