“Azərbaycan və Ermənistan istəmir, Minsk qrupunun qalması məntiqsizdir” - Elçin Mirzəbəyli

 “Azərbaycan və Ermənistan istəmədiyi halda ATƏT-in Minsk qrupu ilə bağlı qərar məntiqsiz görünür”.

News365.az xəbər verir ki, politoloq Elçin Mirzəbəyli ATƏT-in Minsk qrupu ilə bağlı məsələyə münasibət bildirib. Onun sözlərinə görə, bu, şəxsi mövqe ilə deyil, prosedurla bağlı olan məsələdir:

“Əgər münaqişə tərəfləri – Azərbaycan və Ermənistan – artıq belə bir təsisatın fəaliyyətində maraqlı deyilsə, həmin qurumun qalmasının tərəfdarı olan ölkənin mövqeyinə heç bir beynəlxalq legitimlik qazandırmaq olmaz. Yəni, Azərbaycan və Ermənistan istəmir, amma biz istəyirik – bu yanaşma tamamilə məntiqsizdir. Üstəlik, Rusiya da əvvəllər Minsk qrupu ilə bağlı mövqeyini bildirmişdi, münasibətlər normallaşanda bunu dəstəkləsə də, gərginlikdən sonra açıq şəkildə geri çəkildi”.

Politoloq əlavə edib ki, ATƏT-də qərarlar konsensus əsasında qəbul olunur:
“Hazırda əleyhinə çıxış etmək üçün ciddi arqument olmasa da, formal olaraq proses Nazirlər Şurasına çıxarılmalı və orada qərar qəbul edilməlidir. Bu isə sadəcə prosedur məsələsidir”.