Allahşükür Paşazadə Vaşinqtonda nələrdən danışdı? - ƏTRAFLI

Xəbər verdiyimiz kimi Qafqaz Müsəlmanları İdarəsinin sədri Şeyxülislam Allahşükür Paşazadə oktyabrın 1-də Amerika Birləşmiş Ştatlarına səfərə yola düşüb. Şeyxülislamın səfəri İsa Məsih sonuncu gün müqəddəsləri kilsəsinin icması və Stirlinq Fondunun dəvəti ilə Yuta ştatına səfər proqramına uyğun olaraq reallaşıb.

News365.az xəbər verir ki, ABŞ-a səfəri çərçivəsində Şeyxülislam Allahşükür Paşazadənin Vaşinqtonda dinlər bağlı qurumlarda, habelə Senat və Konqres üzvləri ilə görüşlər keçirib.

Allahşükür Paşazadə və onu müşayiət edən heyətin Ağ Evdə ABŞ vitse-prezidenti ofisinin Milli təhlükəsizlik məsələləri üzrə xüsusi müşaviri Endryu Lumis, Vitse-Prezident Aparatının Strateji Məsələlər üzrə Xüsusi Müşaviri Maykl İmbrenda və Dövlət Departamentinin Siyasət Planlaşdırma Şöbəsinin üzvü Conatan Askonas ilə görüşləri xüsusi əhəmiyyəd kəsb edir. Həmin görüşlərdə tərəfləri maraqlandıran məsələlər, o cümlədən, avqustun 8-də ABŞ prezidentİ Donald Trampın, Azərbaycan prezidenti İlham Əliyevin və Ermənistan baş naziri Nikol Paşinyanın iştirakı ilə Vaşinqtonda Azərbaycan və Ermənistan arasında imzalanan sülh protokolundan sonra Cənubi Qafqaz regionu üçün yaranmış yeni fürsətlər, Azərbaycanın nümunəvi məzhəblərarası və dinlərarası təcrübəsinin beynəlxalq miqyaslı önəmi, o cümlədən, Azərbaycan-ABŞ dinlərarası əməkdaşlıq münasibətlərinin inkişafı və davamlı sülhün qurulmasında multikultural dəyərlərin rolu kimi mövzular müzakirə olunub.

Qeyd edək ki, keçirilən görüşlərdə Şeyxülislam Donald Tramp tərəfindən "Azadlığa Dəstək Aktı"nın Azərbaycanla bağlı 907-ci düzəlişin fəaliyyətinin dayandırılmasını yüksək qiymətləndirərək buna görə ABŞ tərəfinə öz minnətdarlığını bildirib. O, Ağ Ev nümayəndələrini Dövlət Departamentində baş tutan ABŞ Beynəlxalq Din Azadlığı Komissiyasının üzvləri ilə görüşü haqqında məlumatlandıraraq ABŞ tərəfini Azərbaycanı din azadlığının vəziyyətinə görə Xüsusi Müşahidə Siyahısından çıxarmağa çağırıb. Qeyd edib ki, belə bir siyahıda Azərbaycanın adının yer alması ölkədə hökm sürən multikultural mühitə və dinlərarası harmoniyaya heç də uyğun deyil.

Görüşlərdə Allahşükür Paşazadə bir məsələyə xüsusi diqqət ayıırıb. O, ABŞ nümayəndələrinin diqqətinı çatdırıb ki, son vaxtlar erməni kilsəsinin rəhbərliyi və erməni diasporası destruktiv mövqedən çıxış edərək sülh prosesinə əngəl olmağa, 8 avqust razılaşmalarına əngəl olmağa çalışır. Bu azmış kimi radikal qüvvələri  yeni qarşıdurmaya və revanşizmə çağırır. Halbuki, əldə edilmiş fürsətdən faydalanmaq üçün dini və ictimai dairələr siyasətçiləri dəstəkləməlidirlər və Azərbaycan tərəfi bəzi erməni dairələrdən, xüsusilə erməni kilsəsindən fərqli olaraq bunu edir.

Görüşlər zamanı Şeyxülislamın bu və digər fikirləri böyük marağa səbəb olub. Onlar səslənən fikirlərə razılıqlarını ifadə ediblər. Tərəflər dünyada, xüsusilə də mürəkkəb geosiyasi bölgədə yerləşən Azərbaycan və Ermənistan arasında davamlı və uzunmüddətli sülhə nail olmaq üçün xalqlar və dinlər arasında qarşılıqlı etimadın və əməkdaşlığın vacib olduğunda həmfikir olduqlarını qeyd ediblər. ABŞ tərəfi bu baxımdan Şeyxülislamın hazırki ziyarətinin xüsusi əhəmiyyətini vurğulayıb. Ali dini liderimiz başçılıq etdiyi QMİ-nin bu istiqamətdə səylərə öz töhfəsini verməyə davam etdirməyə, sülh və birgəyaşayışı dəstəkləyən dinlərarası və sivilizasiyalararası beynəlxalq görüş və konfransları, o cümlədən, ABŞ-ın din əsaslı qurum və təşkilatları ilə birgə layihələri həyata keçirməyə hazır olduğunu bəyan edib.

Qeyd edək ki, kimi Qafqaz Müsəlmanları İdarəsinin sədri Şeyxülislam Allahşükür Paşazadəni bu səfərdə Azərbaycandan böyük heyət müşahidə edib. Belə ki,  BBMM icraçı direktoru Rəvan Həsənov və MM deputatı Cavanşir Paşazadə digər rəsmi şəxslər Vaşinqton görüşlərində iştirak ediblər. Onlar da öz çıxışlarında  ölkəmizdə hökm sürən multikultural mühitdən, dövlət-din münasibətlərinin təkmilləşdirilməsində Azərbaycan parlamentinin rolundan bəhs ediblər. Azərbaycanın dünyada islamofobiya ilə mübarizədə ardıcıl addımlar atdığını və artıq bu sahədə önəmli beynəlxalq platformaya çevrildiyini vurğulayıblar. Qafqaz Müsəlmanları İdarəsinin sədri Şeyxülislam Allahşükür Paşazadənin Amerika Birləşmiş Ştatlarına səfəri davam edir.

Nəzərə alaq ki, Qafqaz Müsəlmanları İdarəsi sədri Şeyxülislam Allahşükür Paşazadə bütün ermənilərin katolikosu II Qareginlə hələlik görüşmək istəmədiyini bəyan edib.
Bir müddət öncə jurnalistlərə açıqlamasında Allahşükür Paşazadə onunla görüşməyi özünə yaraşdırmadığını deyib:

"II Qareginlə hələlik görüşmək istəmirəm. Onunla görüşməyi özümə yaraşdırmıram. Qaregin dini sifətindən başqa siyasi sifəti bürünüb. Din adamın bu qədər siyasətə qoşulması düzgün deyil. Ona görə də onunla görüşmək fikrim yoxdur".

News365.az