"SOCAR Türkiyə"nin yaxın 5 illik hədəfləri açıqlanıb

SOCAR qardaş Türkiyədə fəaliyyətini ilbəil genişləndirir. Artıq SOCAR Türkiyə iqtisadiyyatının ayrılmaz və əsas hissəsinə çevrilib. Və bu uğurlu yol  çox qısa zamanda keçilib. Nəzərə alaq ki, SOCAR 2008-ci ildən etibarən Türkiyədə fəaliyyət göstərir. Lakin, iqtisadi əlaqələr daha əvvəl başlayıb. Şirkət həmin il Türkiyə Respublikasının Özəlləşdirmə İdarəsindən “Petkim” səhmlərinin 51%-ni 2 milyard 40 milyon ABŞ dollarına satın alaraq ölkədəki fəaliyyətinə başlayıb.

News365.az xəbər verir ki, hazırda Türkiyənin ən böyük xarici investoru olan SOCAR, son 17 ildə bu ölkəyə ümumilikdə 18,5 milyard ABŞ dolları həcmində investisiya yatırıb.

Beləki, ötən dövr ərzində SOCAR Türkiyədə  STAR Neft Emalı Zavodunun inşasına 6,7 milyard,  TANAP (Trans-Anadolu Qaz Kəməri)-a 6,31 milyard,  “Petkim”-in satın alınmasına 2,04 milyard,liman əməliyyatlarına 420 milyon, daşınmaz əmlaka 232 milyon, təbii qaz şirkətlərinin alınmasına 180 milyon, saxlanc fəaliyyətinə 110 milyon, Fiber sahəsinə 55 milyon ABŞ dolları həcmində  investisiya yatırıb.

Bundan əlavə, SOCAR Türkiyənin Qrup Şirkətlərinə 2 milyard 445 milyon ABŞ dolları həcmində kapital qoyuluşu edib.

Ümumiyyətlə, "SOCAR Türkiyə" qardaş ölkənin ən böyük inteqrasiya olunmuş sənaye qrupu olaraq, enerji və sənaye sektorlarında fəaliyyətini genişləndirməyə davam edir. Bu investisiyalar Türkiyənin iqtisadi inkişafına əhəmiyyətli töhfələr verməklə yanaşı, iki ölkə arasında strateji əməkdaşlığı da gücləndirir. Təsadüfi deyil ki, bu günlərdə SOCAR Türkiyədə yaxın 5 illik hədəflərini açıqlayıb.

News365.az