Qızıl almaq doğru investisiya etməkdirmi?

Bir çox ailələr düşünür ki, əllərində pul olduqda onu qızıl ziynət əşyasına çevirmək “gələcəyə sərmayədir”. Amma bu böyük bir yanılmadır. Barəsində suallar çoxaldığı üçün toxunduğum bu mövzu kütləvi yanlış düşüncənin formalaşdığı bir istiqamətdir”.

Bunu News365.az-a açıqlamasında iqtisadçı ekspert Eldəniz Əmirov deyib. O bildirib ki, ziynət qızılının qiyməti bir başqadır, alış qiyməti isə tamam başqa:

“Məsələn, qızılın bazar qiyməti 1 qram üçün “x” manatdırsa, 3 qramlıq bir sırğa 3x-ə yox, 8x–10x-ə alınır. Çünki burada ustanın əməyi, dizaynı, mağazanın marjası və digər faktorlar var. Sonradan satmaq istədikdə isə sənə yalnız qızılın qram dəyəri üzrə pul, yəni 3x manat verirlər. Bu halda sən “sərmayə qoymuş” yox, əslində “itki etmiş” olursan.

Odur ki, qızıla doğru sərmayə forması zinət əşyaları deyil, xalis külçə, sikkə, birja alətləri və ya onlayn qızıl investisiya məhsullarıdır. Onların alış-satış fərqi minimaldır və real gələcək dəyəri qoruyur.

Əlqərəz, qızılı “yaman günün yarağı” kimi dəyərləndirmək o halda olar ki, ona yalnız xalis formada sərmayə edilsin. “Mən özümə sırğa aldım, gələcəyə pul yatırdım” düşüncəsi isə sadəcə illüziyadır, ya da bəzənmək üçün bəhanə”.

News365.az