"Putin atəşkəsə getmək istəmir, vəziyyətdən faydalanmağa çalışır"- Politoloqdan şərh

"Putin atəşkəsə getməkdə maraqlı deyil, mövcud vəziyyətdən maksimum bəhrələnməyə çalışır"

Politoloq Elşən Mustafayev News365.az-a açıqlamasında bildirib ki, Rusiya Prezidenti Vladimir Putinlə aparılan danışıqlara baxmayaraq, sülh müqaviləsinin və ya atəşkəsin əldə olunması istiqamətində səylər hələlik nəticə verməyib.

Onun sözlərinə görə, ABŞ sabiq Prezidenti Donald Trampın bəzi açıqlamaları məsələnin ciddiliyini artırsa da, hazırkı şəraitdə Putin atəşkəsə getmək istəmir və mövcud vəziyyətdən maksimum fayda əldə etməyə çalışır. Mustafayev qeyd edir ki, bu yanaşma Rusiyanın danışıqlar masasına öz şərtləri ilə gəlmək istəyi ilə bağlıdır.

Politoloq həmçinin vurğulayıb ki, ortada müəyyən Memorandumun olduğu bildirilir, lakin onun məzmunu tam açıqlanmayıb. Lakin ehtimal olunur ki, sənəddə Rusiya tərəfinin əvvəldən irəli sürdüyü demilitarizasiya, "denazifikasiya", Krım və Donetsk də daxil olmaqla mübahisəli ərazilərin statusu ilə bağlı məsələlər yer alıb.

Mustafayev bildirib ki, hazırkı mərhələdə nə sülh müqaviləsi imzalanır, nə də atəşkəs razılaşması əldə edilir. Bunun səbəbi kimi Rusiyanın hərbi və diplomatik üstünlük əldə etmək istəyi göstərilir. Politoloqun fikrincə, ABŞ və Avropa İttifaqının Ukraynaya yardım mövzusunda ikili yanaşması və qeyri-müəyyən münasibətləri Kremlin vəziyyətdən istifadə etməsinə şərait yaradır.

Eyni zamanda, ABŞ Konqresi və Senatında demokrat və respublikaçı qanunvericilər arasında məsələyə dair birgə təşəbbüslərin formalaşmağa başladığı da qeyd edilir