"O aktrisanı qaytarın ocağına"- Azər Qismət
Xəbər verdiyimiz kimi Əməkdar artist Mehriban
Xanlarova ölkə başçısı İlham Əliyeva müraciət edib. Müraciətdə o, üzləşdiyi
haqsızlıqdan və yenidən doğma kollektivə -Akademik Milli Dram Teatrına qayıtmaq
istəyindən bəhs edib.
Təbii ki, Mehriban Xanlarovanın müracəti
ictimaiyyət tərəfindən birmənalı şəkildə dəstəklənib. Və hər kəs bu məsələdə
Teatrın rəhbərliyini və Mədəniyyət Nazirliyini qınayıb.
Tanınmış ziyalı, yazıçı Azər Qismət də
məsələ ilə bağlı sosial səhifəsində paylaşım edib.
Həmin paylaşımı təqdim edirik:
“Aktyorlar Aleksandr Abdulov və Oleq Yankovski
dəfələrlə məşqə gecikiblər, qışqırıb-bağırıblar, amma Lenkom-un (Lenin
Komsomolu) Bədii rəhbəri və Baş rejissoru Mark Zaxarov onların nazı ilə
oynayıb. Heydər Əliyevin
sözləri ilə deyilərsə, aktyorların öz dünyası var, gərək onlara toxunmayasan. Sənətkar
nə hökmündən qışqırır, nə də fəaliyyətinə görə nazının çəkilməsini istəyir.
Aktyorlar bəşəri, yerə-göyə sığmayan varlıqlardır. Eləcə də əksər incəsənət
adamı. Onların nazı ilə də oynayarlar, hələ təzim də edərlər. Onların
hissiyatının incəliyi özlərindən asılı deyil. Getdikcə göy qübbəsinə məxsusluq
qənaətidir.
Mehriban
Xanlarovanı qaytarın teatra. Oranı yandırmayıb, kiməsə xəsarət yetirməyib, məşqləri
pozmayıb, pərdəyə kilid taxmayıb, tamaşaçılara qaloş atmayıb, kassa qabağında
dayanıb sabotajlıq etməyib ki, tamaşaya bilet almayın. Heç elə qəddarlığın yiyəsi
də deyil. Nə edib ki, bu adam. Azacıq iradını bildirib. O da yaradıcı təşkilatlara
xas xüsusiyyətdir. Zavod, fabrik deyil ki, müdir nə dedisə, o da olmalıdır.
Çünki istehsalat dayana bilər. Yaradıcı təşkilatların müzakirəsinin hay-küylü
olmağı normal qarşılanan haldır. Adı üstündədir: yaradıcılıq. Mark Zaxarov iki
günün içində Abdulovu da, Yankovskini də işdən qovardl. Amma nazları ilə oynayırdı
və xəncərinin qaşı düşmürdü. Çünki bilirdi ki, əsib-coşmaları bəşəriyyətə xidmətdən,
ona məxsus olmadan irəli gəlir. Öz müdirlik zəhmini göstərməyib qoruyurdu.
Bilirdi ki, xətirlərinə dəysə, bundan teatr və kino, ən əsası tamaşaçı itirəcək.
Qaytarın o
aktrisanı. Hara getsin bundan sonra. Qaytarın ocağına”.
