Minalanmış ərazini velosipedlə möcüzəvi şəkildə keçdi

Ukraynada gərgin döyüşlər davam edir. Rusiya mediasının yaydığı məlumata görə, qondarma Donetsk Xalq Respublikasının Krasnoqorovka adlanan ərazisinin sakini rus hərbçilərinin mövqelərinə çatmaq üçün velosipedlə minalanmış sahəni keçməli olub. RT yazır ki, onun əlində ağ bayraq əvəzinə ağ rəngdə paket olub. 

Nəşrin məlumatına görə, rus döyüşçülər pilotsuz uçan aparat vasitəsilə kişinin hərəkətini aşkar edərək onu sona qədər izləyiblər. Əsgərlərə əmr verilib ki, minalanmış sahə ilə hərəkət edən velosipedçiyə atəş açılmasın. Həmin naməlum şəxs gözlənilmədən sağ-salamat əsgərlərin olduğu mövqeyə çata bilib.

RT-nin hərbi müxbiri Andrey Filatov qeyd edib ki, mina sahəsindən sağ çıxan kişi çarəsiz addım ataraq Ukrayna Silahlı Qüvvələrinin mövqelərindən irəli çıxıb.

Qeyd edək ki, Rusiya ilə Ukrayna arasındakı genişmiqyaslı müharibə 2022-ci ilin fevralın 24-də başlayıb. Moskva işğal zamanı qoşunları Kiyevə qədər apara bilsə də, sonradan müharibədə üstünlük nisbətən Ukraynanın tərəfinə keçib. Ukrayna qoşunları ötən ilin iyunundan əks-hücum əməliyyatlarına başladılar. Amma bu da uğurlu olmadı. Son aylarda isə Rusiya yenidən döyüş meydanındakı vəziyyəti öz xeyrinə dəyişə bilib.

Tural