KXDR ABŞ-nin İrana hücumunu sərt şəkildə pislədi
Koreya Xalq Demokratik Respublikasının (KXDR) Mərkəzi Xəbər Agentliyi (KCNA) xəbər verir ki, Şimali Koreya Xarici İşlər Nazirliyi ABŞ və İsrailin İrandakı hərbi addımlarını daha sərt şəkildə pisləməyə çağırıb.
Rəsmi Pxenyana görə, ABŞ və İsrail bu ölkənin suverenliyini və BMT Nizamnaməsini, eləcə də beynəlxalq hüququ kobud şəkildə pozub.
“KXDR ABŞ-nin İrana hücumunu qətiyyətlə pisləyir, bunu suveren dövlətin suverenliyinin, ərazi bütövlüyünün və təhlükəsizliyinin kobud şəkildə pozulması, habelə BMT Nizamnaməsinin ciddi şəkildə pozulması kimi qiymətləndirir”, - nazirlik vurğulayıb.
Şimali Koreya diplomatları həmçinin Yaxın Şərqdəki mövcud vəziyyəti “İsrailin həyasızlığının” nəticəsi adlandırıblar.
Xatırladaq ki, iyunun 22-nə keçən gecə ABŞ prezidenti Donald Tramp ölkənin hərbi hava qüvvələrinin Fordo, Natanz və İsfahan da daxil olmaqla İranın üç nüvə obyektinə hücum etdiyini açıqladı. Amerika lideri bunu ABŞ, İsrail və bütün beynəlxalq ictimaiyyət üçün “tarixi an” adlandırıb və bildirib ki, bu “heyrətamiz uğurdan” sonra İran sülhə razı olmalıdır. Eyni zamanda, İran İslam Respublikası isə iddia edir ki, ABŞ-ın zərbələri onların mühüm obyektlərinə ciddi ziyan vurmayıb.
İsrail iyunun 13-nə keçən gecə İranın nüvə və raket proqramlarına zərər vurmaq üçün "Am KeLavi" (Şir kimi millət) əməliyyatına başladığını elan edib. ÇAXAL Tehran və Natanz da daxil olmaqla bir neçə bölgədə əvvəlcədən müəyyənləşdirilmiş hədəflərə zərbələr endirib. Hədəflər İslam İnqilabı Keşikçiləri Korpusunun (SEPAH) üzvlərinin yerləşdiyi hərbi bazalar, hava hücumundan müdafiə sistemləri və bəzi yaşayış kompleksləri olub.
Belə bir gərginlik fonunda İranın ali dini lideri Əli Xamenei vətəndaşlara müraciət edib. O, gözlənilməz hücumlar nəticəsində bir neçə alim və yüksək rütbəli komandirin həlak olduğunu bildirib. Eyni zamanda Xamneyi İsrailin zərbələrinə cavab məsələsində İran əsgərlərinə “hərəkət azadlığı” verdiyini bildirib. Artıq bir neçə gündür ki, hər iki ölkə qarşılıqlı şəkildə bir-birinin ərazisini bombalayır.
Tural
