Həkim Arzu Quliyeva nadir genetik xəstəliklərlə bağlı skrininq testlərinin əhəmiyyətindən bəhs edib

Nadir genetik xəstəliklərlə mübarizədə əsas məqsəd diaqnostik tədbirləri genişləndirmək və genetik tibbin imkanlarını səhiyyə sisteminə mümkün olduğu qədər inteqrasiya etməkdir.

News365.az xəbər verir ki, xəbər verir ki, bunu Tibbi genetika üzrə uzman həkim Arzu Quliyeva fevralın 28-də Nadir Xəstəliklər Günü münasibətilə Nadir Xəstəliklər Təşkilatları İttifaqı İctimai Birliyi tərəfindən Bakıda təşkil olunmuş I Respublika Nadir Xəstəliklər Forumundakı çıxışı zamanı səsləndirib.

Azərbaycanda nadir xəstəliklər sahəsində mövcud vəziyyətin və gələcək inkişaf istiqamətlərinin müəyyənləşdirilməsi barədə müzakirələrin aparıldığı Forumda Arzu Quliyeva “Nadir genetik xəstəliklərin Azərbaycan mənzərəsi: Reallıqlar və gələcək inkişaf” mövzusundakı çıxışında bir çox nadir xəstəliklərin gec müəyyən edilməsi  probleminə toxunub.

Məruzədə ölkədə bəzi nadir genetik xəstəliklərin hazırkı mənzərəsi və diaqnostik imkanların inkişaf perspektivləri təhlil edilib, erkən diaqnostikanın gücləndirilməsi və skrininq testlərinin sistemli tətbiqi prioritet istiqamət kimi təqdim olunub.

Məruzəçi xüsusilə prenatal və yenidoğulmuşların skrininq proqramlarının genişləndirilməsinin əhəmiyyətini vurğulayıb, bununla yanaşı, Azərbaycan üçün geniş miqyaslı milli genom tədqiqatının aparılmasının strateji əhəmiyyətini diqqətə çatdırıb.