Ermənistanda seçki öncəsi gərginlik artır: Rusiya və Qərb amili

Ekspertin sözlərinə görə, bu proseslər Rusiyanı narahat edir və Moskva Cənubi Qafqazda təsir imkanlarını qorumağa çalışır. Onun fikrincə, Rusiya Ermənistanı öz siyasi orbitindən çıxmağa imkan verməmək üçün müxtəlif vasitələrdən istifadə edir.

Politoloq bildirib ki, Gürcüstanın Qərbə inteqrasiya kursu və Azərbaycanın müstəqil siyasəti fonunda Rusiya regionda əsas təsirini daha çox Ermənistan üzərində saxlamağa çalışır. Bu məqsədlə seçkilər ərəfəsində müxtəlif siyasi qüvvələrin dəstəkləndiyi iddia olunur.

Əhməd Şahidovun sözlərinə görə, Ermənistan daxilində siyasi rəqabət də kəskinləşib. Baş nazir Nikol Paşinyan rəqiblərini Rusiyaya bağlı qüvvələr kimi təqdim edir, müxalifət isə onu ölkənin maraqlarını Qərbə yönəltməkdə ittiham edir.

O əlavə edib ki, seçkilərə yaxınlaşdıqca qarşılıqlı ittihamlar daha da artacaq və siyasi mübarizə daha sərt xarakter alacaq. Ekspert qeyd edib ki, bu prosesdə həm daxili siyasi qüvvələr, həm də xarici diaspor strukturlarının təsiri hiss olunur.

Sonda politoloq bildirib ki, Ermənistanda keçiriləcək seçkilər kifayət qədər gərgin mühitdə baş tutacaq və nəticələr ölkənin gələcək siyasi kursuna ciddi təsir göstərə bilər.