Bakıdan ABŞ-da sensasion addım: CNN-ə qarşı rəsmi iddia qaldırıldı
Azərbaycan ABŞ-ın federal məhkəməsində “CNN” media şirkətinə qarşı məhkəmə iddiası qaldırıb. İddiaya səbəb telekanalın 2026-cı il iyunun 5-də dərc etdiyi, Azərbaycana qarşı əsassız və təxribat xarakterli məlumatların yer aldığı məqalədir.
Həmin yazıda Azərbaycan ərazisinin guya İsrail tərəfindən İrana qarşı hərbi və kəşfiyyat əməliyyatlarında hücum platfroması kimi tətbiq olunduğu iddia edilib. Məqalədə İsrail xüsusi təyinatlılarının Azərbaycanın cənub sərhədlərində fəaliyyət göstərdiyi, pilotsuz uçuş aparatları (PUA) idarə etdiyi və ərazidə dinləmə cihazları yerləşdirdiyi irəli sürülüb.
Rəsmi Bakının mövqeyi nəzərə alınmayıb
Material dərc olunmazdan əvvəl rəsmi Bakı CNN-in müraciətinə cavab olaraq iddiaları qətiyyətlə rədd edib və ölkə ərazisinin üçüncü dövlətlər tərəfindən İrana qarşı istifadəsinə icazə verilmədiyini bəyan edib. Buna baxmayaraq, media qurumu rəsmi mövqeni gözardı edərək anonim mənbələrə söykənən materialı yayımlayıb.
Sitatlaşdırılan açıqlamasında politoloq Turan Rzayev News365.az-a bildirib ki, anonim mənbənin varlığı iddianın doğruluğunu sübut etmir və dövlətlərarası hərbi məsələlərdə konkret sübutlar tələb olunur.
CNN-in sistemli qərəzi
Məsələnin yalnız bir məqalə ilə məhdudlaşmadığını vurğulayan politoloq, CNN yazarı Tim Listerin 2020-ci il Vətən müharibəsi və 2023-cü il anti-terror tədbirləri zamanı da Azərbaycana qarşı oxşar qərəzli materiallar hazırladığını xatırladıb.
Turan Rzayevin sözlərinə görə, Azərbaycan tərəfi məsələni dərhal məhkəməyə daşımayıb, əvvəlcə media qurumuna materialı araşdırmaq və səhvi düzəltmək imkanı verib. Lakin beynəlxalq media məsuliyyətindən boyun qaçırdığı üçün hüquqi müstəvidə addım atılması zərurəti yaranıb. Əgər CNN iddialarını məhkəmədə sübut edə bilməzsə, Azərbaycanın təkzib və düzəliş tələbini qəbul etmək məcburiyyətində qalacaq.
